Dióxido de carbono iha atmosfera rejista aumentu rekorde iha 2015

Dióxido de carbono (CO2) iha atmosfera rejista aumentu rekorde, ho kresimentu 3,05 partes hosi millaun (ppm) iha 2015 - Tuir medisaun estasaun referénsia Mauna Loa, iha Hawai.


 

Tuir Ajénsia Oseánika no Atmosférika (NOAA, iha inglés), informa iha loron-kinta ne’e katak  aumentu "importante" ne’e iha tanba mosu korrente mariña manas iha Pasífiku ho naran El Niño. Korrente ne’e sei mosu hikas iha kada tinan tolu to’o lima no provoka mudansa iha floresta no ekosistema terrestre sira seluk, ne’ebé hamosu modifikasaun klima no aumentu udan, esplika NOAA.

 

Ajénsia ne’e hanoin hikas katak aumentu CO2 markadu liu to’o ohin loron mak iha 1998, tinan ne’ebé El Niño maka’as tebes. "Impaktu El Niño iha konsentrasaun CO2 hanesan fenómenu naturál ho durasaun barak", haktuir sekretáriu-jerál Organizasaun Meteorolójika Mundiál (OMM) nian, Petteri Taalas. "Maibé emisaun gás tanba efeitu estufa mak mais hosi atividade ema nian hanesan prinsipál fatór tempu naruk nian ne’ebé justifika  aumentu CO2 atmosfériku. Ita iha meiu no responsabilidade hodi redús", afirma iha komunikadu.

 

Iha fulan-novembru OMM sei publika relatóriu ida kona-ba konsentrasaun gás tanba efeitu estufa iha planeta, ho dadus hosi nasaun 50, iha ne’ebé inklui estasaun ho altitude boot hanesan Alpes, Andes no Himalaias, no mós Ártico, Antártida no súl Pasífiku.

 

Maibé hatene ona katak iha fulan-janeiru no fevereiru 2016 konsentrasaun mensál média CO2 nian iha planeta aas liu limite simbóliku 400 ppm. Iha fevereiru, nível ne’e iha 402,59 ppm, haktuir NOAA. Iha marsu 2015, konsentrasaun mundiál média mensál CO2 nian iha atmosfera ba dala uluk aas liu barreira 400 ppm.

 

To’o mosu revolusaun industriál no jeneralizasaun iha uzu enerjia fósil boboot, taxa ne’e la supera 300 ppm - portantu, durante pelumenus tinan 800.000. Observatóriu Mauna Loa hanesan estasaun medisaun atmosférika antiga liu no konsidera hanesan fatin referénsia ba rede OMM nian.

 

SAPO TL ho AFP

 

horadoplaneta às 02:41 | link do post | comentar | Adicionar aos favoritos