Poluisaun maka halo ema 23% mate iha mundu tomak

Fatór ambienta sira iha nia sentidu estensu maka halo ema 1/4 mate iha mundu tomak, fó sai hosi Organizasaun Mundial Saúde nian. 

 

 

Relatóriu ida hosi Organizasaun Mundial Saúde nian, publika iha loron-tersa, hanoin katak iha 2012 ema hamutuk millaun 12,6 resin mate tanba "kontaminasaun hosi ár, bee no rai", "espozisaun ba substánsia kímiku sira", "mudansa klimátiku sira" no "raiu UV".

 

Organizasaun hanoin katak ema millaun 8,2 mate tanba moras sira ne'ebé la transmiti no iha ligasaun ho poluisaun iha ár. Hanesan, liuliu asidente vaskular selebral sira, moras fuan nian, kankru no moras respiratóriu sira.

 

Trauma sira lahó intensaun, hanesan asidente sira tránzitu nian, klasifikadu mós hosi OMS hanesan sintoma sira ne'ebé relasionadu ho meiu ambiente no reprezenta mate hosi ema millaun 1,7 iha 2012.

 

OMS konsidera katak asidente rodoviáriu sira iha relasaun ho meiu ambiente tanba akontese beibeik tanba estrada sira nia kondisaun ne'ebé ladi'ak.

OMS fiar katak diareia, ne'ebé okupa fatin daneen iha grupu hosi moras sanulu ne'ebé OMS hato'o, mosu beibeik hosi rede sanitáriu ida ne'ebé fraku, halo ema na'in 846.000 mate tinan-tinan.

 

"Traumatizmu voluntáriu sira", ne'ebé inklui oho-aan, sai hanesan kauza ba dasanuluk hosi mate sira ne'ebé relasionadu ho meiu ambiente. Ba OMS, oho-aan balun mosu tanba asesu ba produtu tóxiku sira hanesan pestisida.

 

Ba organizasaun internasional, "jestaun di'ak ida ba meiu ambiente sei salva tinan-tinan" labarik millaun 1,7 ne'ebé seidauk iha tinan lima no salva katuas-ferik hamutuk millaun 4,9.

 

"Iha tinan 2002, ita iha 25% resin hosi ema sira ne'ebé mate iha mundu tomak tanba meiu ambiente, ohin loron hamutuk 23% resin, maibé tanba populasaun aumenta ona iha tinan sanulu nia laran kuantidade sei aas nafatin", hatete hosi médika María Neira, diretora hosi Departamentu Saúde Públiku no Meiu Ambiente, ne'ebé haktuir hos ajénsia notísia France Presse.

 

Iha sudeste Ázia nian maka rejista númeru aas hosi ema sira ne'ebé mate tanba meiu ambiente, hamutuk millaun 3,8. Iha fatin daruak maka rejiaun Pasífiku (ho millaun 3,5), tuir Áfrika (ho millaun 2,2), Europa (ho millaun 1,4), Médiu Oriente (ho 854.000) no Amérika (ho 847.000).

 

Hodi rezolve situasaun, OMS hato'o medida simples sira: hamenus emisaun hosi karbonu sira, dezenvolve rede sira transporte koletivu nian, hadi'a rede sanitáriu, kombate dalan sira konsumu hodi hamenus uzu ba produtu kímiku sira, protesaun maka'as ba ultravioleta no bandu maka'as ba tabaku.

 

ho AFP

horadoplaneta às 14:11 | link do post | comentar | Adicionar aos favoritos