Populasaun kosteira oriental sira maka afetadu liu ho El Niño iha Timor-Leste

Populasaun hosi zona kosteira sira hosi distritu timoroan sira nian iha Lautem ho Viqueque maka agora daudaun afetadu liu tanba impaktu hosi fenómenu El Niño iha Timor-Leste, ho risku aas ba falta hahán, haktuir relatóriu ida. 


EPA@ António Amaral

 

Relatóriu ikus hosi organziasaun Seeds of Life, ne'ebé monitoriza hela impaktu hosi fenómenu El Niño, refere katak rejiaun sira ne'e iha situasaun emerjénsia no "tenki iha asisténsia lalais".

 

Iha tempu hanesan estudu rekomenda monitorizasaun iha illa Ataúro no iha enklave Oecusse, liuliu iha zona kosteira sira, tanba kolleita ne'ebé ladún iha.

El Niño hanesan naran ne'ebé fó ba padraun klimátiku ida ne'ebé asosiadu ho perídu naruk hosi akesimentu iha Pasífiku tropikál sentrál no oriental.

 

Fenómenu sira El Niño maka hanesan alterasaun sira hosi fulan 12 no 18 iha distribuisaun ba temperatura hosi superfísie bee nian iha Oseanu Pasífiku, ne'ebé iha efeitu sira iha meteorolojia rejiaun nian.

 

Espesialista sira refere katak fenómenu iha tinan ne'e - ida ne'ebé rejista maka'as liu - hahú iha fulan-Maiu tinan liubá, ho intensidade ida entre "moderadu no forte" no karik sei dura to'o tinan 2016 nia klaran.

 

Iha kazu Timor-Leste nian, fenómenu halo udan to'o tarde no besik hotu ona hodi hamosu susar ba agrikultór sira nasaun nian, liuliu iha parte kuda hare no batar no problema hahán ba família barak.

 

Relatóriu ikus hamutuk hosi organizasaun sira hanesan Care, Caritas, Oxfam, PLAN ho World Vision, haree, hanesan ezemplu, katak 62% hosi inkiridu sira hato'o katak udan ladún tau, ho 26% tenki muda nia fonte primáriu no tersu rua tenki ba fonte bee nian ne'ebé laiha protesaun (mota ka bee-lihun).

 

70% resin hatete katak laiha bee ba sira nia kultura no 44% esplika katak iha dieta ne'ebé maka'as liu duké hanesan baibain, ho metade refere ba diminuisaun ida iha númeru refeisaun.

 

Bainhira kuda hare no batar la hetan udan-been sai hanesan problema iha fatin balun, udan boot senti iha zona prinsipál balun iha foho sira nian ne'ebé hanesan fatin agríkola, hanesan problema ida ba diminuisaun hosi modo-tahan sira, ho agrikultór barak maka kesar kona-bá bee-sa'e no destruisaun iha sira nia produsaun.

 

Peter Dougan hanesan responsável hosi empreza FarmPro ne'ebé serbisu hamutuk ho agrikultór na'in 60 resin hosi zona sira Ermera no Bobonaro, hodi fornese modo-tahan ba supermerkadu prinsipál sira, hotel sira no restaurante sira iha Díli, semana ida dala rua.

 

Nia esplika katak, tinan-tinan, iha tempu ne'e, baibain verifika falta balun iha modo-tahan, ho udan ne'ebé maka'as estraga no hamenus produsaun hosi brókolu sira, kouve xineza (bok choi), kouve-flor, alfase ka tomate.

 

Situasaun "normal" ida maibé, nia insisti katak, bele hahú koriji ho estratéjia sira hodi hasoru ho époka udan nian, liuliu produsaun metin sira ne'ebé hahú halo iha fatin balun iha nasaun laran maibé la to'o ba merkadu.

 

"Produtór sira modo-tahan nian hasoru susar beibeik bainhira udan tau maka'as. Bee-sa'e ka tahu ne'ebé estraga produsaun sira. Sira ne'ebé hahú moris hetan atake hosi moras ka insetu", nia eplika ba Lusa.

 

"Prudutu sira ne'ebé gosta udan hanesan berinjela ka kanku moris di'ak maibé sira seluk iha difikuldade", nia hatete.

 

Ne'e bele haree ona iha supermerkadu sira iha Díli ne'ebé iha aumenta hosi konsumidór sira no ladún iha oferta hodi halo prateleira sira modo-tahan oioin mamuk tebes.

 

Loja ida ne'ebé Lusa vizita iha loron-segunda ne'e iha de'it kouve roxa ho lakeru. "Tenki dezenvolve estratéjia foun sira hodi hasoru époka udan sira ne'ebé hanesan fenómenu ida iha tinan-tinan", hatete hosi Peter Dougan.

 

ho Lusa

horadoplaneta às 15:39 | link do post | comentar | Adicionar aos favoritos