UE promove negósiu entre Europa ho Brazil ba projetu ambientál sira

Uniaun Europeia sei promove troka esperiénsia no negósiu entre empreza brasileira no europeia sira hodi aumenta uzu teknolojia ne’ebé bele ajuda atu redús emisaun gás efeitu estufa iha indústria brazileira.

                                        Foto: © 2007 LUSA - Agência de Notícias de Portugal

 

Projetu Low Carbon Business Action in Brazil (Ação Empresarial de Baixo Carbono no Brasil) identifika hela área no setór sira iha Brazil ne’ebé bele adere ba prosesu no teknolojia ho emisaun karbonu ki’ik.

 

Sei realiza enkontru negósiu tolu iha tinan ne’e no, pelumenus, tolu tan iha 2017, ho partisipasau empreza brazileira no europeia ki’ik ho média sira besik 720.

 

Enkontru dahuluk sei hala’o iha agostu, tuir Ajénsia Brazil.

 

Projetu ne’e sei finansia to’o 80% hosi kustu lojístiku no viajen empreza sira-nian, ho investimentu euro millaun tolu to’o 2018.

 

Sei lansa mós mekanizmu apoiu finanseiru nian atu empreza sira bele dezenvolve proposta sira.

 

Ricardo Esparta, espesialista iha teknolojia ho karbonu ki’ik iha projetu ne’e, hatete ba Ajénsia Brazil katak programa ne’e fó ajuda atu atinje "objetivu sira Konvensaun Klima" no apoia empreza europeia sira ho interese ekonómiku iha área no mós brazileira sira, fornese teknolojia ba sira hodi redús emisaun.

 

Tuir espesialista ne’e, setór ida ne’ebé mak tenke destaka mós iha enkontru entre emprezáriu sira mak biogás, haree ba iha Brazil eziste potensiál hodi prodús gás naturál, maibé falta teknolojia, hanesan ekipamentu hodi prodús no halo produtu ne’e sai moos ho maneira ne’ebé efisiente liu.

 

SAPO TL ho Lusa

 

horadoplaneta às 01:27 | link do post | comentar | Adicionar aos favoritos