Malaui deklara estadu katástrofe naturál tanba rai-maran - Prezidente

Prezidente Malaui, Peter Mutharika, deklara iha loron-kuarta ne'e estadu katástrofe natural iha nasaun tanba falta hahán, ne'ebé mosu tanba rai-maran ne'ebé atinji Áfrika Austral iha tinan ida resin nia laran. 

 

EPA@ Rungroj Yongrit

 

"Ha'u deklara katak Malaui iha estadu katástrofe natural hafoin períudu rai-maran ne'ebé naruk, durante époka agríkola 2015-2016", hatete hosi Mutharika iha komunikadu.

 

Aleinde Malaui, Mosambike, Zámbia no Zimbabué hasoru susar maka'as iha abastesimentu hahán nian, no Áfrika-Súl deklara ona rai-maran ne'e hanesan ida ne'ebé aat liu iha tinan 100 nia laran.

 

"Diminuisaun hosi kolleita previstu ba batar maka 12% resin relasionadu ho produsaun iha tinan liubá. Ema barak sei hetan susar ba hahán no sei presiza asisténsia humanitáriu iha tinan 2016-2017 nia laran", nia hatutan.

 

Programa Alimentár Mundial (PAM) indika ona katak agora daudaun fó asisténsia ba ema millaun tolu resin iha Malaui, ne'ebé hamutuk distritu 23 hosi distritu 28 maka afetadu.

 

"Situasaun hanesan todan tebes no ami hanoin katak situasaun aat liu seidauk akontese. Sei demora tempu atu situasaun ne'e sai di'ak. Bainhira di'ak iha fulan hirak tuirmai sei laiha signifikadu", hatete hosi David Orr, portavós hosi PAM ba Áfrika Austral.

 

Iha viziñu Zimbabué, ema millaun 2,8 - liu 1/4 hosi populasaun rural - laiha hahán sufisiente. PAM fornese, agora daudaun, asisténsia ba ema rihun 730 resin.

 

ho Lusa

horadoplaneta às 14:53 | link do post | comentar | Adicionar aos favoritos