Estudante biolojia ida hosi Amarante sai voluntária ba natureza iha Indonézia

Estudante biolojia nian ida, tinan 19, hosi Amarante, sei partisipa iha misaun voluntária hodi prezerva natureza iha Indonézia, organiza hela kampañ ida hodi halibur euro 3.000 hodi finansia inisiativa ne’e.

Foto: Ondasuaves

 

"Ha’u fiar iha solidariedade ema nian hodi konsege hetan totál ne’ebé presiza to’o iha veraun 2017", tenik joven ne’e, iha deklarasaun ba Lusa.

 

Marisa Naia sei promove venda rifa no atividade sira seluk ne’ebé envolve komunidade. Estudante ne’e estima katak sei presiza euro 3.000, orsamentu ne’ebé prevee bele sufisiente hodi finansia espedisaun ne’e (euro 1.880), vou no ekipamentu.

 

"Ha’u hili Indonézia hanesan destinu. Iha ne’ebá ha’u hakarak intervein iha parte florestál no mariña bo ha’u sei halo parte iha grupu investigasaun ida", hatete Marisa Naia, tinan 19, iha deklarasaun ba Lusa.

 

Nia esplika katak tipu espedisaun no projetu investigasaun ne’e finansia hosi estudante sira ne’ebé aseita partisipa hanesan voluntáriu.

Joven ne’e hatete katak Operation Wallacea deskobre ona espésie foun iha mundu tomak no balun konsidera mohu ona, maibé hetan fila fali.

 

Estudante ne’e esplika katak nia misaun durante semana rua, iha veraun 2017, sei ajuda investigadór sira, ne’ebé sei permite atu aprende téknika ne’ebé utiliza no manán koñesimentu kona-ba fauna no flora nasaun ne’e nian.

 

Joven hosi Amarante ne’e frekuenta segundu anu biolojia iha Fakuldade Siénsia, Universidade do Porto no hakarak tuir karreira konservasaun espésie.

 

Tuir futura investigadora ne’e importante liu hosi asaun voluntária ne’e sei halibur koñesimentu kona-ba " buat ne’ebé halo hodi garante planeta ne’ebé di’ak liu ba future jerasaun sira".

 

Marisa deside integra iha programa voluntariadu ne’e, hafoin koñese Operation Wallacea, organizasaun internasionál ne’ebé atua iha fatin oioin iha mundu, iha ne’ebé sira observa fenómenu ne’ebé iha ligasaun ho espésie ne’ebé mohu ona, dezflorestasaun no akesimentu globál.

 

Operation Wallacea halibur investigadór konsagradu no alunu inexperiente sira iha expedisaun relasiona ho konservasaun moris fuik. Servisu ne’e inklui identifikasaun area sira ne’ebé presiza protesaun no implementasaun programa konservasaun.

 

Iha área florestál, Marisa Naia revela katak objetivu prinsipál mak impaktu dezflorestasaun, ne’ebé konsidera hanesan "kazu preokupante iha Indonézia", no monitorizasaun animál.

 

Tuir fali, iha parte mariña, joven ne’e sei frekuenta kursu mergullu ne’ebé sei prepara hodi hahú servisu daruak ho objetivu atu proteje resife korál.

 

"Lokál hirak ne’e hanesan fatin infinidade ba ser úniku sira, liu-liu iha zona ne’e, tanba iha ne’e mak iha maiór biodiversidade korál iha mundu", nia esplika.

 

Marisa Naia promete, iha finál projetu ne’e, sei anunsia rezultadu ne’ebé hetan iha espedisaun ne’e.

 

SAPO TL ho Lusa

horadoplaneta às 04:56 | link do post | comentar | Adicionar aos favoritos