FAO husu 109 MD hodi tulun ema afrikanu millaun 23 ne'ebé afetadu ho rai maran

Organizasaun ba Alimentasaun no Agrikultura (FAO) husu ona, iha loron-kinta ne'e, pelumenus dolar millaun 109 hodi tulun ema millaun 23 iha Áfrika Austral, ne'ebé hasoru daudaun ho rai maran ne'ebé aat liu iha tinan 35 ikus ne'e. 

 

 

Iha semana balun hodi hahú preparasasun ba rai hodi halo époka agríkola tuirmai, ajénsia hosi ONU esplika ona iha komunikadu katak folin ne'e sei destina hodi fó fini sira, fertilizante sira, ekipamentu sira no sasán sira seluk no serbisu sira ba agrikultór ki'ik sira no pekuarista sira hosi rejiaun.

 

Komunikadu hatutan katak objetivu maka iha époka agríkola tuirmai bele prodús hahán sufisiente hodi evita dependénsia ba ajuda humanitáriu to'o tinan 2018 nia klaran.

 

"Agrikultór sira tenki konsege kuda to'o fulan-Outubru no, bainhira sira la konsege, ami sei iha kolleita ida ne'ebé tuun iha fulan-Marsu 2017, afeta maka'as seguransa alimentar no nutrisional no moris sira iha rejiaun", alerta ona hosi organizasaun iha komunikadu.

 

Rai maran iha tinan rua konsekutivu, inklui ida ne'ebé aat liu iha tinan 35 ikus, ne'ebé akontese iha tinan ne'e, halo ema millaun 40 resin iha rejiaun hasoru risku inseguransa hahán to'o inísiu tinan oinmai.

 

Nasaun sira hotu senti afetadu, maibé Estadu neen - Botsuana, Lesoto, Malaui, Namíbia, Suazilándia no Zimbabué - deklara tiha ona emerjénsia nasional sira tanba rai maran, bainhira Áfrika-Súl deklara ona estadu emerjénsia iha provínsia ualu hosi nia provínsia sia no Mosambike deklara tiha ona alerta mean ida durante loron 90 iha zona balun iha súl no sentru nasaun nian.

 

Iha loron-tersa, Komunidade Dezenvolvimentu hosi Áfrika Austral (SADC) deklara ona rai maran dezastre rejional no apela ona ba tulun hosi komunidade internasional.

 

Apelu hosi SADC refere katak presiza dolar biliaun 2,7 hodi tulun área hotu hosi ekonomia rejiaun nian hodi rekupera hosi rai maran iha tinan ne'e, ne'ebé iha falta selu dolar biliaun 2,4.

 

Iha okaziaun, prezidente Botsuana no mós hosi SADC, Seretse Khama Ian Khama, hatete ona katak avaliasaun foun sira "hatudu katak númeru hosi ema sira ne'ebé iha inseguransa hahán nian maka besik millaun 40, ne'ebé reprezenta besik 14% hosi populasaun total" komunidade nian.

 

Tuir komunikadu FAO iha loron-kinta ne'e, planu hodi hatán ba ajénsia ONU nian sei alarga ba nasaun 10 - Lesoto, Madagáskar, Maláui, Mosambike, Namíbia, Áfrika-Súl, Suazilándia, Tanzánia, Zámbia ho Zimbabué - ne'ebé husu ona asisténsia espesífiku.

 

"Nível aas sira hosi dezempregu no diminuisaun ba kresimentu ekonómiku signifika katak dalan prinsipal hodi ema sira hetan hahán maka liuhosi buat ne'ebé sira produs rasik. Ajuda sira hodi halo sei fornese apoiu maka'as ida iha rejiaun ida ne'ebé pelumenus 70% hosi populasaun depende ba agrikultura hodi moris", hatete hosi kordenadór FAO nian ba Áfrika austral, DAvid Phiri, haktuir iha komunikadu organizasaun nian.

 

"Ita tenki hasai buat barak hosi janela ki'ik oportunidade nian no garanti katak agrikultór sira prontu hela hodi kuda to'o fulan-Outubru, bainhira hahú udan", nia hatutan.

 

Rai maran atual akontese tanba fenómenu El Niño no nia efeitu sira sei atinji nível máximu entre fulan-Janeiru no fulan-Marsu 2017, hatete hosi FAO.

 

Aleinde estraga iha agrikultura, ne'ebé aumenta malnutrisaun krónika iha rejiaun, rai maran halo ona bibi rihun 640 resin mate iah Botsuana, Suazilándia, Áfrika-Súl, Namíbia no Zimbabué, tanba ladún iha duut hodi haan, falta bee ka mosu moras oioin.

 

Iha reseiu katak iha tinan ne'e nia rohan sei mosu kontra fenómenu El Niño, ho naran La Niña, ne'ebé sei lori udan maka'as, no bele sai pozitivu ba agrikultura maibé mós bele hamosu bee-sa'e ne'ebé bele estraga produsaun no ameasa animal sira.

 

ho Lusa

horadoplaneta às 15:56 | link do post | comentar | Adicionar aos favoritos