Japaun fó euro millaun 2,4 ba vítima sira rai-maran nian iha Mosambike

Governu Japaun sei fó dolar millaun 2,7 (euro millaun 2,4) hodi apoia emerjénsia ba vítima sira rai-maran nian iha Mosambike, embaixada nipóniku fó sai hosi komunikadu iha Maputu. 

 

 

Tuir nota, ajuda halo parte hosi osan ho folin dolar millaun lima (eurp millaun 4,4) ne'ebé Japaun sei entrega ba Programa Alimentar Mundial (PAM), hodi tulun vítima sira hosi efeitu sira fenómenu klimátiku El Niño, iha Áfrika Austral.

 

"Ajuda emerjénsia ne'e destina hodi fó hahán no apoiu nutrisional ba Mosambike, Malaui, Lezoto no Suazilándia, ne'ebé nesesidade humanitáriu sira aumenta maka'as, tanba rai-maran ne'ebé El Niño hamosu", haktuir hosi komunikadu.

 

Aleinde kompromete ba parte boot hosi períudu dahuluk époka agríkola tinan 2016 nian, rai-maran ne'ebé afeta provínsia sira iha sentru no súl Mosambike nian halo ema millaun 1,5 maka iha inseguransa alimentar.

 

Hodi hatán ho di'ak ba nesesidade populasaun nian, Institutu Nasional ba Jestaun hosi Dezastre sira (INGC) buka hela dalan sira hodi harii infraestrutura sira rezistente liu no bele disponibiliza lalais informasaun sira hodi fó lalais asisténsia ba ema sira, iha planu ida ne'ebé iha osan ho folin dolar millaun 400 (euro millaun 355) tinan-tinan.

 

Situasaun hosi ema sira ne'ebé afetadu tanba rai-maran iha Mosambike halo Governu dekreta iha fulan-Abrik "alerta mean" hodi dinamiza asaun sira asisténsia nian ba populasaun sira.

 

Mosambike hanesan tinan-tinan hetan bee-sa'e maka'as, fenómenu justifika tanba nia lokalizasaun jeográfiku, iha entre maioria hosi basia hidrográfiku sira hosi Áfrika Austral, maibé parte súl nasaun nian maka afetadu ho rai-maran naruk no tinan ne'e atinji mós provínsia sira hosi rejiaun sentru.

 

Aleinde Mosambike, rai-maran afeta mós nasaun oioin hosi Áfrika Austral, halo Malaui, Zámbia no Zimbabué deklara ona estadu emerjénsia tanba falta hahán.

 

Rai-,maran, ne'ebé dura liu tinan ida resin, afeta mós poténsia boot rejiaun nian, Áfrika-Súl ne'ebé deklara ona rai-maran ne'e hanesan ida ne'ebé aat liu iha tinan 100 ikus ne'e.

 

ho Lusa

horadoplaneta às 23:24 | link do post | comentar | Adicionar aos favoritos