Angola hanesan nasaun luzófonu ho mortalidade aas relasionadu ba poluisaun ár nian - OMS

Angola hanesan nasaun luzófonu - no ida hosi nasaun afrikanu ualu - ho taxa aas liu ba mortalidade ne'ebé iha ligasaun ho poluisaun atmosfériku, ho ema na'in 50 entre ema rihun 100 maka mate tanba espozisaun ba ár ne'ebé ladi'ak. 

 

Ar poluidu iha sidade Beijing, Xina. Imajen ne'ebé hasai iha loron 22 Dezembru 2015. Foto@ Wu Hong / EPA

 

Informasaun sira halo parte iha relatóriu "Poluisaun hosi ár ambiente: Avaliasaun Global ida hosi Espozisaun no todan moras nian", ne'ebé fó sai iha loron-tersa ne'e hosi Organizasaun Mundial ba Saúde (OMS) no ne'ebé konklui katak ema millaun tolu mate tinan-tinan tanba kauza sira ne'ebé iha relasaun ho poluisaun ár esterior no katak 92% hosi populasaun mundial respirta ár ne'ebé la moos.

 

Ho rekursu ba modelu foun ida avaliasaun nian ba kualidade ár nian, OMS konfirma katak ema na'in sia entre na'in sanulu moris iha fatin sira ne'ebé kualidade ár esteriór aas liu limiti ne'ebé defini tiha ona.

 

OMS defini ba limiti konsentrasaun anual médiu ho mikrograma 10 ba metru kúbiku ida hosi partíkula mihis sira (PM2,5), valor ne'ebé, tuir relatóriu, aumenta iha nasaun luzófonu sira maibé la konta ho Portugal (9) no Brazil (10).

 

Iha tabela ne'e, nasaun luzófonu ne'ebé hetan liu klasifikasaun aat maka Cabo Verde, ne'ebé aprezenta konsentrasaun médiu ida ho 36 mikrograma hosi partíkula mihis sira tuir metru kúbiku, bainhira tenki hanoin ba medisaun sira iha ambiente rural no urbanu.

 

Guiné Ekuatorial aprezenta konsentrasaun média anual ida ho 33 mikrograma hosi partíkula mihis sira tuir metru kúbiku, Guiné-Bissau 27, Mosambike 17, Timor-Leste 15 no São Tomé & Prínsipe 13.

 

Bainhira konsidera de'it mediasaun sira iha ambiente urbanu, Angola sai hanesan nasaun luzófonu ho rezultadu aat liu, aprezenta konsentrasaun médiu anual ida ho 42 mikrograma hosi partíkula mihis sira tuir metru kúbiku ár nian, númeru ne'ebé tuun ba 27 bainhira konta ho zona rural no urbanu sira.

 

Númeru sira bazeia hosi medisaun sira liuhosi satelit, modelu sira transporte aéreu nian no estasaun sira hosi sukat poluisaun atmosfériku iha fatin 3.000 resin, iha fatin rural no mós urbanu sira, no estudu dezenvolve hosi OMS hamutuk ho Universidade Bath, iha Reinu Unidu. Relatóriu halo mós avaliasaun ida hosi impaktu hasoru espozisaun ár poluidu iha saúde, bazeia iha informasaun hosi tinan 2012.

 

Iha nível global, autór sira konklui katak ema millaun tolu ne'ebé mate tinan-tinan iha ligasaun ho poluisaun atmosfériku, liuliu ba moras respiratóriu todan sira, moras pulmaun obstrutivu krónika, kankru pulmaun nian, moras relasionadu ho sirkulasaun ba fuan nian no asidente vaskular serebral.

 

Entre nasaun luzófonu sira, Angola hanesan nasaun ne'ebé iha ema barak mate tanba poluisaun atmosfériku nian - na'in 51 entre populasaun rihun 100. Bainhira kompara ho nasaun afrikanu sira seluk, iha de'it nasaun hitu maka iha taxa aas: Mali (60), Burkina Faso (58), Níker (57), Eritreia (56), no Benim, Chade ho Repúblika Demokrátika Kongo (52).

 

Guiné Ekuatorial iha taxa ida ba ema na'in 50 mate tanba poluisaun ár esteriór entre populasaun rihun 100, Guiné-Bissau 47, Cabo Verde 37, Timor Leste 31, São Tomé & Prínsipe 26, Brazil 14 no Portugal hitu.

 

Tuir relatóriu, partíkula poluente sira konsisti iha partíkula sólidu ne'ebé kahur maka'as ho partíkula been sira hosi substánsia orgániku sira no la orgániku sira ne'ebé metin iha ár.

 

Komponente barak liu maka sulfatu, nitratu, amónia, kloretu sódiu, karbonu metan no pó mineral, no sira seluk.

 

Partíkula sira hanesan ka ki'ik liu duké mikrómetru hosi diámetru sanulu hanesan perigozu tebes tanba bele tama no hela metin iha pulmaun sira.

 

ho Lusa

horadoplaneta às 12:05 | link do post | comentar | Adicionar aos favoritos