Tesi ai iha Dili-laran la’os polítika Governu maibé tanba obra

Primeiru ministru Rui Maria de Araújo ohin dehan katak, ai-hun hirak ne’ebé hetan tesi iha Dili, semana hirak ne’e nia laran, inklui sira ne’ebé antigu liu, hanesan “kestaun prátika” ida ne’ebé relasiona ho obra hirak ne’ebé halo iha Dili no la’os polítika Governu nian.


Foto: @teodolindareishornay

 

"Kestaun ne’e iha ligasaun ho obra, hanesan halo estrada, paseiu no valeta bee nian. Tuir dokumentu kontratu nian ne’ebé iha, ami labele dehan katak bele tesi ai ida ne’e ka ida ne’ebá”, dehan  Rui Maria de Araújo.

 

"Ida ne’e la’os kestaun polítika, maibé implementasaun obra nian. Ami fó hanoin beibeik ona ba Ministériu Obras Públikas katak importante atu ko’alia ho konstrutór no operadór sira, hodi respeita ambiente. Ami kontinua halo ida ne’e", hatutan tan ida ne’e ba Lusa, durante konferénsia ida iha Dili.

 

Rui Araújo dehan katak haree ba kestaun prátika “ne’e lafasil” atu konsege, tanba sempre iha ezizénsia atu latesi ai hirak ne’e.

"Faze ne’e difisil. La’os polítika Governu nian hodi tesi ai-hun hirak ne’e, maibé labele ezizi, katak latesi. Hanesan kestaun prátika ida ne’ebé, ami koko atu rezolve”, nia esplika.

 

Iha semana hirak ikus ne’e, mosu informasaun oioin iha rede sosiál ho foto kona-ba ai-hun hirak ne’ebé hetan tesi iha sidade, inklui ai antigu ka ai hirak ne’ebé kuda kleur ona iha kapitál Dili.

 

Tanba atu halo konstrusaun foun ba kanál eskoamentu bee nian, maka ai hirak ne’ebé kuda iha paseiu, hetan tesi.

 

SAPO TL ho Lusa

tags:
horadoplaneta às 08:07 | link do post | comentar | Adicionar aos favoritos