Sei taka sentral elétriku ne'ebé halo poluisaun maka'as iha Austrália

Sei taka sentral produsaun enerjia elétriku ida ne'ebé halo poluisaun maka'as hosi Austrália, fó sai hosi proprietáriu iha loron-kinta ne'e no hetan felisitasaun hosi ambientalista sira. 


Foto@ David Crosling / EPA


Hazelwood, sentral produsaun eletrisidade ne'ebé funsiona ho karvaun, iha Latrobe Valley, iha estadu Victoria, sei taka iha fulan-Marsu tinan oinmai hafoin sentral boot fransés Engie desidi tiha ona katak unidade ne'e labele funsiona ona.

 

Ema na'in 500 resin maka sei lakon serbisu bainhira taka unidade ne'e, no na'in 250 sei serbisu to'o tinan 2023 hodi sobu sentral karvaun nian no sobu reabilitasaun hosi mina ne'ebé besik fatin ne'e. Engie hatete mós katak sei fa'an sentral Loy Yang B, ne'ebé funsiona mós ho karvaun no sentral produsaun eletrisidade ne'ebé funsiona ho gás.

 

"Hazelwood agora daudaun iha tinan 50 resin. Sai hanesan kontribuidor di'ak ba merkadu eletrisidade nasional, maibé agora to'o ona pontu ida ne'ebé labele funsiona" iha ekonomia, afirma ona hosi prezidente ezekutivu Engie nian iha Austrália liuhosi komunikadu.

 

"Engie iha Austrália sei presiza investe maka'as iha dolár biliaun resin hodi garanti operasaun di'ak ida no liuliu tenki seguru nafatin. Tanba kondisaun atual sira no previzaun hosi merkadu, nível investimentu ne'e laiha ona justifikasaun", nia hatete.

 

Hazelwood - ne'ebé fornese 22% hosi nesesidade enerjétiku sira hosi estadu Victoria no 4% hosi Austrália - kaer hosi Engie (72%) no hosi empreza japuneza Mitsui (28%).

 

Paris indika ona, iha tinan liubá nia rohan, katak Engie - ne'ebé nia parte balun kaer hosi governu fransés - sei para investe iha dezenvolvimentu hosi sentral sira ne'ebé funsiona ho karvaun, fonte maka'as liu hosi emisaun sira dioksidu karbonu nian. Karvaun ho kór kastañu halo liu poluisaun duké karvaun metan nune'e maka ambientalista sira felisita medida ne'e.

 

"Hazelwood hanesan sentral ida ne'ebé maka halo poluisaun maka'as iha Austrália no iha mundu", hatete hosi xefe ezekutivu hosi Fundasaun ba Konservasaun Australianu, Kelly O’Shanassy.

 

"Hanesan momentu importante iha tranzisaun ba buat ne'ebé maka hala'o daudaun - mudansa ba enerjia ‘moos’”, nia hatutan no konsidera katak polítika enerjétiku Austrália nian hasoru daudaun situasaun ne'e.

 

Governu federal fó sai ona pakote ida apoiu nian ba traballador sira hamutuk 43 millaun dolar australianu ne'ebé tau hamutuk ho sira seluk hosi dolar millaun 22 hosi governu estadu nian.

 

Ministru Enerjia, Josh Frydenberg, afirma ona katak sei superviziona bafatin impaktu hosi taka sentral ne'e. Iha tinan hirak ikus ne'e taka ona sentral oioin iha nasaun laran.

 

63% hosi enerjia elétriku iha Austrália funsiona hahú hosi karvaun, haktuir hosi informasaun ofisial tinan 2014-2015.

 

ho Lusa

horadoplaneta às 14:21 | link do post | comentar | Adicionar aos favoritos