Timor-Leste hakarak to’o 2030 metade hosi produsaun elétrika maihosi renovável

Timor-Leste hakarak, to’o 2030, 50% hosi ninia produsaun eléktrika bele maihosi  fonte renovável, liliu solar, haktuir  horisehik ba Lusa diretór jerál Eletrisidade Ministeiru Obras Públikas, Transporte no komunikasaun timoroan.


Foto:joalarcao

 

 “ Meta ba 2030 atu to’o ba  50% hosi renovável. Ne’e hanesan planu ambisiozu ida no ami hakarak halo konversaun termoelétrika hosi diesel ba gás. Ami hein katak, iha 2017, ami bele deskuti ona ho Governu foun Timor-Leste nian”, afirma Virgílio Fátima Guterrres, ne’ebé partisipa iha Simeira ba Klima  (COP 22), iha Marraquexe.

 

Timor-Leste iha matriz elétrika hosi sentrál termoelétrika ba diesel. Iha  sentrál rua ho  megawatts 250.

 

 “Hanesan enerjia fossil ida no kustu ne’ebé aas tebes iha termu manutensaun no operasaun nian. Termoelétrika ba diesel reprezenta 99% hosi jerasaun eletrisidade nian”, hatete nia.

 

Agora, Estadu maka responsabiliza  tranzisaun enerjétika no implementasaun renovável sira. Maibé iha futuru, tuir Virgílio Guterres katak iha ona ideia atu loke ba merkadu privadu.

 

 “Ohin loron ba jerasaun elétrika iha Estadu nia liman, maibé partisipasaun hosi setór privadu sei importante tebes”, nia haktuir.

Tuir direktór jerál Eletrisidade, potensia ba renovável iha Timor-Leste maka megawatts 452 inklui fonte hídrika, solar, eólika no biomassa.

 

Timor-Leste tenki aposta dahuluk iha solar hanesan renovável prinsipál. Nasaun iha deit  sentrál hidroeléktrika kiik ida ho kilowatts 322 no seidauk dezemvolve eólika.

 

Virgílio Guterres afirma katak kooperasaun téknika sei importante  ba Timor-Leste atu bele konsege avansa iha ninia planu estratéjiku dezemvolvimentu nasionál to’o 2030.

 

 “Kooperasaun téknika ne’e importante tebes iha momentu agora. Ami presiza tékniku kualifikadu iha futuru, Portugál bele koopera ho Timor-Leste iha termu tékniku”, tenik responsável ne’e.

 

Kobertura eléktrika nasaun nian kobre ona 84% hosi populasaun timoroan ne’ebé maka asessu ona ba forma moderna iha eletrisidade. Entre sira ne’e, 11% hosi populasaun uza  ahi  liuhosi fonte renovável.

 

Horisehik, Ministru Komérsiu, Indústria no Ambiente timoroan, Constânscio da Conceição Pinto, reuni iha marjen COP22 ho ministru Ambiente Portugál, João Pedro Matos Fernandes.

 

Timor-Leste hakarak hetan rekursu hosi Fundu Verde Klima nian hodi tenta finansia projetu tanzisaun eléktrika. Tanba hola parte iha grupu nasaun  menus dezenvolvidu. Timor-Leste bele ho fasilidade hetan finansiamentu.

 

Konferénsia Kuadru Parte 22.ª kona-ba Mudansa Klimátika (COP 22) kontinua iha Marraquexe to’o  sesta-feira ne’e.

 

SAPO TL ho Lusa

horadoplaneta às 03:08 | link do post | comentar | Adicionar aos favoritos