Ema oho líder indíjena ambiental mexikanu ne'ebé la konkorda ho tesi ilegal ai-hun sira

Líder indíjena mexikanu, ne'ebé hetan Prémiu Ambiental Goldman iha tinan 2005, tanba luta hasoru tesi ilegal ai-hun sira, ema oho, liutiha tinan ida hafoin líder ida seluk ne'ebé simu mós Prémiu ne'e ema oho iha Honduras. 

 

Foto@ Environmental Organization Goldman Handout/EPA

 

Gabinete hosi prokurador ba Estadu Chihuahua, iha norte nasaun nian, liuhosi komunikadu ida, informa ona iha loron-kuarta katak Isidro Baldenegro, tinan 51, ema oho iha loron-domingu, iha nia tio nia uma, iha sidade Guadalupe y Calvo. Autoridade sira investiga hela motivu.

 

Prokurador sira adianta ona katak Baldenegro hetan tiru pelumenus dala neen, no tiru ne'e kona iha hirus-matan, kabun no ain sira.

 

Mane ida ho tinan 25, ne'ebé autoridade sira buka hela hanesan suspeitu, iha mós fatin akontesimentu no halai hafoin tiruteiu.

 

Fundasaun Ambiental Goldman fó sai ona komunikadu ida, hodi deklara katak "senti perturbadu tebes", tanba akontesimentu ne'e no apela ona ba investigasaun ida, hodi hatete katak Baldenegro hanesan líder hosi povu indíjena Tarahumara.

 

"Nia serbisu kontínuo, organiza protestu pasífiku sira hasoru tesi ilegal ai-hun sira iha foho sira Sierra Madre nian ajuda ona proteje ai-laran sira, rai sira no direitu sira hosi nia povu", afirma ona hosi prezidente Goldman nian, Susan R. Gelman.

 

Ativista indíjena ambiental seluk, feto hondureña ho naran Berta Caceres, ne'ebé simu ona Prémiu Goldman 2015 tanba organiza opozisaun hasoru projetu hidroelétriku ida iha rai ansentral sira hosi nia povu Lenca, ema oho iha loron 03 Marsu, bainhira mane sira ho kilat tama iha nia uma iha kalan no hahú tiru hasoru nia dala haat.

 

Observador sira hatete beibeik katak oho ativista ambiental sira akontese beibeik iha Amérika Latina. Tuir organizasaun la'ós governu nian Global Witness, ema na'in 450 resin maka ema oho iha rejiaun entre tinan 2010 no 2014.

 

ho Lusa

horadoplaneta às 16:17 | link do post | comentar | Adicionar aos favoritos