Xina konvida Trump hodi kombate hamutuk alterasaun klimátiku

Iha loron-segunda ne'e, Governu xinés konvida administrasaun foun Estadus Unidus nian, ne'ebé diriji hosi Donald Trump, hodi kombate hamutuk alterasaun klimátiku no subliña katak nasaun hotu-hotu tenki kumpri Akordu Paris nian. 

 

 

Hua Chunying, porta-vós hosi ministériu xinés Negósiu Estranjeiru nian, garanti ona iha konferénsia imprensa katak Pekin "mantén kontaktu" ho Ezekutivu foun norte-amerikanu.

 

"Xina hakarak serbisu ho parte tomak, inklui ho Administrasaun foun EUA nian, hodi kontinua diálogu no koperasaun kona-ba kestaun alterasaun klimátiku sira nian", Hua hatete.

 

Porta-vós hosi ministériu konsidera ona Akordu Paris hanesan "marka istóriku" ida, ne'ebé Xina hakarak implementa iha nia polítika doméstiku sira no hakarak promove iha estranjeiru.

 

"Hanesan rezultadu ida ne'ebé susar atu hetan. Nasaun tomak tenki tuir tendénsia, aprovaita oportunidade, adopta asaun sira no implementa akordu ba jerasaun futuru sira nia di'ak", nia hatete.

 

Hua insisti iha vontade Xina nian hodi serbisu hamutuk ho Trump, maski iha krítika sira hosi Prezidente norte-amerikanu kona-ba polítika komersial sira hosi nasaun aziátiku ka nia aproximasaun ba Taiwan, ne'ebé Pekin konsidera hanesan nia teritóriu no la'ós hanesan entidade polítika soberanu ida.

 

"Ami prontu hodi serbisu ho Administrasaun foun (Estadus Unidus nian) ho dalan konstrutivu, hodi buka solusaun ba ami nia diferensa sira no evita atu estraga relasaun jeral sira entre nasaun rua ne'e", afirma hosi porta-vós.

 

Durante kampaña no bainhira sai nu'udar Prezidente eleitu, Donald Trump duun nasaun aziátiku ne'e ba "manipulasaun osan nian" ka "boikot", no ameasa ona fó taxa ba produtu xinés sira ho 45%.

 

Analista sira balun konsidera katak bele akontese funu komersial ida entre nasaun ekonomia boot rua iha mundu.

 

"Funu sira ka konfrontasaun komersial sira sei la hamosu vensedór, estraga de'it interese sira hosi parte rua no hosi parte tomak", Hua hatete no insisti Washington hodi rezolve ho Pekin sira nia problema no dezarkordu iha área komersial.

 

ho Lusa

horadoplaneta às 22:51 | link do post | comentar | Adicionar aos favoritos