Movimento Tasi Moos - Ita nia Oseanu sira no ita nia futuru

Nasaun Unidu dezigna loron 8 Juñu hanesan Loron Mundial Oseanu nian, loron ofisial ba selebrasaun, hodi hanoin nia importánsia iha planeta nia moris no oinsá ita bele proteje nia.


Oseanu sira okupa 2/3 hosi superfísie Rai nian no liuhosi interasaun atmosfera nian, litosfera no biosfera, iha knaar importante ida iha kondisaun klimatériku sira planeta nian. Iha fatin seluk, oseanu sira la'ós de'it fatin ba ai-horis sira no animal sira, maibé mós fó hahán, enerjia, oksijéniu no rekursu oioin ba ema moris.

 

SAPO Timor-Leste iha oportunidade ida hodi halo entrevista ba fundador hosi Movimentu Tasi Moos, Gally Soares Araújo, hodi ko'alia kona-ba movimentu, edukasaun ambiental iha Timor-Leste no mós kona-ba alterasaun klimátiku.

 

 

SAPO TL: Oinsá maka movimentu ne'e hahú?
Gally Soares Araújo: Movimentu Tasi Moos moris iha loron 16 Juñu 2015 liuhosi ha'u nia inisiativu rasik iha rede sosial sira hodi hahú atividade ida hodi hamoos voluntáriu iha tasi-ibun Dolok Oan, iha Díli, Timor-Leste. Iha loron ne'ebá, aparese ema na'in 20 resin, ha'u nunka halo kontaktu antes ho ema balun ne'ebé mosu iha loron ne'ebá. Ami hamoos parte balun tasi-ibun nian no, iha momentu ne'ebá ami hanesan oituan, no ami hahú iha semana tuirmai. Iha signifikadu maka'as mai ami no ami hahú hatene katak iha ema barak hanesan ami iha Timor-Leste no ami hahú envolve tan ho ema barak no ho entidade públika no privadu sira.

 

SAPO TL: Saida maka sai hanesan movimentu nia objetivu?

 

Gally Soares Araújo: Objetivu maka sensibilzia populasaun iha jeral kona-ba kestaun ambiental sira no nia impaktu diretu sira iha ema moris iha prazu badak, médiu ho prazu naruk. Hanesan harii perspetiva foun sira kona-ba foer sira, tenta hatene liután kona-ba tipu sira foer nian ne'ebé maka ita haree iha ita nia nasaun no nia orijen sira, no naturalmente, importánsia hosi jestaun ba rekursu natural sira, nune'e mós nia impaktu iha dezenvolvimentu hosi turizmu ne'ebé realista no sustentável liu ba Timor-Leste - no, ikusmai, oportunidade negósiu sira ne'ebé iha relasionadu ho foer.

 

SAPO TL: Movimentu nia projetu envolve munisípiu tomak timoroan nian?

 

Gally Soares Araújo: Ho limitasaun ne'ebé iha, Movimentu halo tiha ona atividade pontual balun iha munisípiu sira ne'ebé iha fatin turístiku sira importante liu ba nasaun, hanesan Foho Ramelau, Ilhéu Jaco, Ataúro, no fatin sira seluk. Ami hakarak aumenta mós ami nia atividade sira ba munisípiu sira seluk no envolve entidade governamental sira no eskola sira, la'ós de'it iha atividade sira limpeza ba tasi-ibun sira maibé mós harii dinamizmu boot ida, hodi sustenta atividade sira hodi bele dura no ho konsiénsia ambiental nian.

 

SAPO TL: Hakarak mós sensibiliza ema timoroan sira kona-ba kestaun sira relasionadu ho alterasaun klimátiku sira? No, iha ita nia opiniaun, katak ema timoroan sira hatene kona-ba kestaun sira ne'e?

 

Gally Soares Araújo: Ami nia foku maka sensibiliza joven timoroan sira, no nune'e maka ami hanoin inklui mós labarik sira no joven estudante sira iha ami nia atividade sira. Hanesan fásil tebes alkansa aman-inan sira liuhosi sira nia oan, no labarik sira hanesan ita nia futuru.

 

SAPO TL: Aleinde alterasaun klimátiku, ita hanoin katak ema timoroan sira entende signifikadu hosi Edukasaun Ambiental?

 

Gally Soares Araújo: Kestaun ambiental hanesan asuntu foun ida iha istória humanidade nian, iha nasaun dezenvolvidu barak ne'ebé maka kleur ona explora no la haree ba meiu rekursu natural sira ne'ebé planeta iha, ignora efeitu sira ne'ebé maka sira bele hamosu, hanesan ita haree daudaun. Povu timoroan hanesan povu ida ne'ebé maka adapta lalais ba mudansa sira, hanesan ita bele haree oituan ba istória nasaun nian.

Povu hanesan joven, hakarak aprende no kria horizonte foun sira. Faze ne'e hanesan importante liu hodi fó koñesimentu foun sira ba nível tomak no kestaun ambiental halo mós parte, hanesan mós tendénsia global ida, realidade ida. Hanesan ezemplu, iha Bali dezenvolve maka'as turizmu lahó planeamentu no agora daudaun iha estraga maka'as iha nível ambiental nian, Timor-Leste iha oportunidade boot hodi aprende ho sala viziñu nian no labele monu iha sala hanesan. Ho atribuisaun internasional foun sira ba bee sira Timor nian tanba iha biodiversidade mariña boot iha mundu, hanesan todan ida ne'ebé ita nia Governu tenki haree hodi kuida di'ak rikusoin natural sira nasaun nian.

Ho liafuan seluk, ha'u fiar katak sei iha tempu hodi ita halo mudansa ba rezultadu di'ak no ami iha ne'e hodi kontribui ho buat ne'ebé ami bele ba futuru hosi ita nia bei-oan sira.

 

 

SAPO TL: Projetu sira movimentu nian iha apoiu hosi parte governu timoroan nian?

 

Gally Soares Araújo: Movimentu Tasi Moos nia atividade tomak hanesan voluntáriu hosi parte membru sira no hosi entidade sira ne'ebé halo parte hamutuk ho ami. Governu fó atensaun espesial mai ami, la ignora ami no ami iha nafatin relasaun di'ak ida kona-ba atividade hodi hamoos tasi-ibun sira no partisipasaun sira iha semináriu sira no workshop sira. Ami hein katak iha relasaun saudável ida ho Governu ruma, tanba Estadu maka jere nasaun no imparsialidade hanesan impostante hodi ita bele hetan objetivu komun ida ba povu no nasaun.

SAPO TL: Movimentu hetan problema barak iha nível ambiente nian iha Timor-Leste?

 

Gally Soares Araújo: Sei iha problema todan sira, maibé bele rezolve bainhira iha vontade no seriedade hosi sé maka foti desizaun sira. Ita presiza jestaun ida ne'ebé di'ak liu ba rezíduo sólidu sira no líkidu sira, ita presiza sentru ida resiklajen nian ne'ebé adapta ba teknolojia foun sira, ne'ebé transforma foer ba enerjia, no seluk tan.

 

Ita presiza liután sensibilizasaun iha eskola sira, iha uma, iha media sira, ita presiza atu Governu foti medida todan sira iha entidade sira ne'ebé prejudika ambiente, ita presiza kria akordu bilateral sira ho Indonézia hodi exporta plástiku tomak, no la'ós de'it, ne'ebé to'o iha kontentor sira iha Timor-Leste ne'ebé mai hosi Indonézia loron-loron, ita presiza kria polítika loloos ida, nune'e mós sériu iha nia implementasaun hodi ita bele tuir dalan ida de'it ba dezenvolvimentu nian no liuliu ita presiza pasiénsia maka'as, tanba hanesan ha'u hatete antes katak ne'e hanesan kestaun metal ida bainhira ita haree ba kestaun ambiental. Nune'e, rezultadu sira la'ós hetan lalais.

 

SAPO TL: Foin lalais, ita iha polémika kona-ba kaer tubaraun sira iha bee timoroan sira nian ne'ebé halo hosi ró xinés sira. Oinsá ita nia hanoin kona-ba asuntu ne'e?

 

Gally Soares Araújo: Hanesan refere antes iha komunikasaun sosial sira, ne'e hanesan asuntu sériu ida no todan ne'ebé Governu tenki hili hodi foti desizaun ida todan tebes ba kompañia xineza. Iha mínimu, hakotu ho kontratu ne'ebé ezisti no aplika multa ne'ebé todan.

Empreza lokal sira bainhra hala'o projetu públiku ida ho dimensaun ki'ik no la kumpri regulamentu sira ne'ebé Governu fó hetan kedas kastigu, to'o tama iha lista metan, no ita labele kompara estraga sira ne'ebé ita haree. Nu'udar sosiedade sivil, ami hakarak haree Timor-Leste di'ak ba ema sira ne'ebé hela iha nasaun ne'e, no ami tau fiar tomak iha ita nia líder sira hodi sai hanesan matadalan ba futuru di'ak ida.

 


SAPO TL: Nu'udar fundador movimentu nian, hakarak husik mensajen ida ne'ebé motiva partisipasaun hosi ema timoroan sira kona-ba ambiente?

 

Gally Soares Araújo: Nu'udar fundador Movimentu nian, ha'u haksolok haree rezultadu ne'ebé ami hetan ona no haree katak vale duni hahú buat ida ne'ebé ita fiar hanesan sustentável ba nasaun. Hatudu katak nu'udar voluntáriu ita bele halo mudansa, ita bele kria dalan foun sira hodi hanoin entre komunidade ida, no ita bele envolve ema tomak iha nível oioin ba kauza ida de'it.

 

Ha'u husik de'it mensajen ida ba joven sira: ita sei iha buat barak atu halo, ita iha misaun boot ida ba oin. Ita nia koñesimentu ne'ebé hetan sei la to'o bainhira laiha humildade hodi aprende fali ho ema katuas-ferik sira hodi ita bele hatene katak ita mai hosi ne'ebé no diresaun ida ne'ebé maka ita la'o.

Agora daudaun iha tentasaun barak hodi estraga nasaun, hanesan fásil monu ba tentasaun maibé importante liu la'ós buat ne'ebé aprende iha momentu, maibé buat ne'ebé maka aprende iha prazu naruk. Hanesan importante atu ita hamutuk iha dezenvolvimentu nasaun nian.

 

SAPO TL: Movimentu Tasi Moos sei halo atividade ruma hodi selebra nia aniversáriu daruak?

Gally Soares Araújo: Ami sei selebra ami nia aniversáriu daruak iha loron-sesta tuirmai, loron 23 Juñu, no ami hanoin atu fila fali ba fatin ne'ebé maka ami hahú iha tinan rua liubá, iha tasi-ibun Dolok Oan, no ami hetan atu simu prezensa hosi labarik barak, joven sira, entidade públika sira, embaixada sira no empreza privadu sira iha Timor-Leste.

 

@ (Ivonia Kehik) SAPO Timor-Leste

horadoplaneta às 15:41 | link do post | comentar | Adicionar aos favoritos