UNICEF: Ema millaun 180 resin laiha asesu ba bee-moos

Ema millaun 180 resin laiha asesu ba bee-moos iha nasaun sira ne'ebé afetadu ho funu, violénsia no instabilidade iha mundu tomak, UNICEF alerta iha loron-tersa ne'e, iha inísiu Semana Mundial Bee nian. 

 

 

"Ema sira ne'ebé moris hasoru situasaun instável sira hanesan naturalmente susar tebes hetan bee-moos ne'ebé maka populasaun sira iha situasaun estável iha: hosi ema millaun 484 resin ne'ebé maka laiha moris hakmate iha 2015, ema millaun 183 laiha servisu báziku bee-moos nian", haktuir hosi análize foun ida hosi Organizasaun Mundial Saúde (OMS) nian no hosi Fundu ONU nian ba Infánsia (UNICEF), hatete hosi UNICEF iha komunikadu.

 

Diretór hosi Programa Bee, Saneamentu ho Hijiene hosi ajénsia espesializadu ONU nian, Sanjay Wijesekera, hatete iha loron-tersa ne'e katak "labarik sira nia asesu ba bee-moos no saneamentu hanesan direitu ida, la'ós priviléjiu", razaun ne'ebé nia defende ona katak "iha nasaun sira ne'ebé hasoru violénsia, ho ema deslokadu sira, konflitu sira no instabilidade, dalan báziku sira hosi sobrevivénsia labarik sira nian - bee - tenki sai hanesan prioridade".

 

Iha Iémen, "nasaun ida ne'ebé senti impaktu hosi tinan rua resin konflitu nian, rede sira abastesimentu bee nian ne'ebé serve sidade boot sira hetan risku beibeik tanba estraga sira ne'ebé maka funu halo" no "ema millaun 15 resin la hetan asesu regular ba bee no saneamentu", UNICEF hatete.

 

Iha Síria, "ne'ebé konflitu atinji ona tinan dahitu, ema millaun 15 resin presiza bee-moos, inklui labarik millaun 6,4 resin", hakerek iha dokumentu ne'ebé hatudu mós katak "bee uza beibeik hanesan arma funu nian: iha de'it tinan 2016, pelumenus ko'a bee ho intensaun dala 30 - inklui iha Alepo, Damasku, Hama, Raqa ho Dara, ho bomba sira bee nian hetan destruisaun no fonte sira hetan kontaminasaun".

 

Iha Nijéria, iha área sira ne'ebé afetadu ho konflitu, iha nordeste nasaun nian, "75% hosi infraestrutura sira bee no saneamentu nian hetan estraga ka hetan destruisaun, halo ema millaun 3,6 laiha serbisu báziku sira bee nian", hatutan hosi UNICEF.

 

Iha Sudaun-Súl, "ne'ebé violénsia kontinua iha tinan tolu resin nia laran, kuaze metade hosi fonte sira bee nian ba nasaun tomak hetan estraga total ka danifikadu", refere hosi dokumentu.

 

Wijesekera alerta ona katak "bainhira labarik sira laiha bee-moos hodi hemu no bainhira sistema sira saúde nian hetan estraga, subnutrisaun no moras sira ne'ebé bele oho ema, hanesan kólera, sei mosu lalais".

 

Hanesan ezemplu, iha Iémen, "labarik sira konstitui 53% resin hosi kazu millaun resin ne'ebé deskonfia ba kólera ho diareia todan ne'ebé maka rejista ona to'o agora; Somália sofre surtu maka'as hosi kólera iha tinan lima ikus ne'e, ho kazu suspeitu ba kólera/diareia hamutuk 77.000; no iha Sudaun-Súl, epidemia kólera hanesan todan liu ne'ebé maka nasaun ne'e hasoru, ho kazu hamutuk 19.000 hahú hosi Juñu 2016", hatutan hosi testu ne'e.

 

"Iha nordeste Nijéria nian, terus tanba hamlaha, iha Somália, Sudaun-Súl ho Iémen, kuaze ema millaun 30, inklui labarik millaun 14,6, presiza urjente bee-moos", no "labarik millaun lima resin laiha hahán sufisiente, labarik millaun 1,4 iha estadu ne'ebé todan", konklui hosi ajénsia espesializadu ONU nian.

 

ho Lusa

horadoplaneta às 12:36 | link do post | comentar | Adicionar aos favoritos