ONU: Tinan-tinan dezastre natural sira halo ona ema millaun 14 resin deslokadu

Dezastre natural maka'as ne'ebé tinan-tinan afeta zona oioin iha mundu halo deslokamentu forsadu ba ema millaun 13,9, hatete hosi relatóriu hosi ajénsia ONU hodi Hamenus Risku sira Dezastre nian (UNISDR) iha loron-kuarta ne'e. 

 

 

Ho baze hosi métodu foun ida análize nian, relatóriu foun hosi UNISDR avalia ona informasaun sira relasionadu ho nasaun no teritóriu hamutuk 204 no konklui ona katak númeru ema deslokadu sira iha nível mundial sei aumenta nafatin, liuliu iha nasaun fraku sira, bainhira laiha progresu maka'as iha área sira prevensaun nian no hosi jestaun risku nian.

 

Estudu hosi ajénsia ONU nian, ne'ebé la inklui rai-maran ho aumentu hosi nível tasi nian tanba hanesan fenómenu natural sira hosi progresaun neineik, aponta ona ba inundasaun sira, ne'ebé nia frekuénsia aumenta iha nível mundial, hanesan dezastre natural ne'ebé hamosu deslokadu maka'as.

 

Maski hosi relasaun ne'ebé estabelese entre fenómenu natural sira ne'ebé maka'as tebes no deslokamentu forsadu hosi populasaun sira, responsável hosi estudu, Justin Ginnetti, realsa katak movimentasaun boot sira ne'e iha mós ligasaun ba falta governabilidade, ba kiak, ba diminuisaun hosi ekosistema sira no ba dezenvolvimentu urbanu ida ne'ebé konfuzu.

 

Furakaun ho siklone oioin, iha fulan hirak ikus ne'e, halo ona ema mate barak no halo estraga iha Caraíbas no iha Estadus Unidus. Hetan mós rekord ida hosi inundasaun iha nasaun sira hanesan Índia, Nepal ho Bangladexe.

 

Nasaun ualu hosi nasaun sanulu ne'ebé iha númeru boot deslokadu sira nian ka iha ema sira ne'ebé lakon uma tanba dezastre natural sira agora daudaun lokaliza iha súl no sudeste Ázia nian.

 

Tuir númeru sira ne'ebé aprezenta hosi UNISDR, Índia rejista ema deslokadu hamutuk millaun 2,3, tuir Xina (millaun 1,3) ho Bangladexe (millaun 1,2).

 

Lista hosi nasaun sanulu ne'e mós komposta hosi Vietname (millaun ida), Filipina (rihun 720), Birmánia (rihun 570), Pakistaun (rihun 460), Indonézia (rihun 380), Rúsia (rihun 250) ho Estadus Unidus (rihun 230).

 

ho Lusa

horadoplaneta às 15:39 | link do post | comentar | Adicionar aos favoritos