Kímiku poluente sira ameasa ursu polar sira - Estudu

Kímiku poluente sira hanesan mós ameasa ida ba ursu polar sira nia moris, aleinde akesimentu global, konklui hosi estudu ida ne'ebé fó sai iha loron-sesta ne'ebé bazeia iha serbisu investigasaun durante tinan 40 nia laran. 

 

EPA@ Greenpeace Photo

 

Tuir estudu, publika iha revista sientífiku Environmental Toxicology and Chemistry, katak poluente sira ne'e reprezenta risku ida aas tebes ba ursu sira nia saúde duké limiti ne'ebé konsideradu aseitável ba animal adultu sira.

 

Iha ursu oan sira, bele hetan kímiku sira iha inan nia susubeen, risku ne'ebé aas tebes.

 

Sientista sira halo serbisu durante tinan 40 kona-ba espozisaun hosi ursu polar sira ba kímiku sira, maibé mós halo ba foka sira no ikan bakallau, iha área entre illa Svalbard (Noruega) ho estadu Alaska (Estadus Unidus), fatin rua ne'e iha oseanu Ártiku.

 

"Hanesan estudu dahuluk ne'ebé hakarak determina kuantidade hosi risku ne'ebé poluente orgániku sira ne'ebé persistente reprezenta ba ekosistema ártiku nian", hatete, no haktuir hosi ajénsia AFP, autora prinsipal hosi estudu ne'e, Sara Villa, toxikólogu hosi Universidade Milano-Bicocca, iha Itália.

 

Poluente orgániku persistente sira, uza iha agrikultura ho iha indústria, hanesan pestisida, mantén durante dékada resin iha natureza, kontamina kadeia alimentar: liu, hanesan ezemplu, hosi plankton (organizmu ki'ik tebes ne'ebé iha tasi-been nia leten) ba ikan sira, hafoin ne'e ba foka sira no ikusmai ba iha ursu sira.

 

Bainhira akumula iha organizmu, to'o hetan doze sira ne'ebé nakonu tebes ho veneno, kímiku sira bele afeta duni sistema imunitáriu sira, reprodutivu ho endókrinu sira.

 

Vestíjiu sira hosi poliklorobifenilu sira (PCB), hanesan orgániku persistente ne'ebé poluente tebes, ne'ebé bandu ona nia uzu hahú hosi dékada 70, hetan ona iha ursu polar sira, haktuir hosi investigasaun.

 

Família foun sira hosi kompostu kímiku sira, hanesan ásidu perfluorooktanessulfóniku (PFOS), konsidera hanesan "ida ne'ebé nakonu tebes ho veneno ba mamíferu sira", hodi troka PCB.

 

Tuir estudu, konsentrasaun sira hosi PFOS maka aas liu iha ursu polar sira, aas liu duké iha foka sira.

 

Sustánsia kímiku sira ne'ebé autorizadu uza hodi labele halo bokon surat-tahan, hena, mobiliáriu sira, evita noda bee nian ka mina, no hodi halo espuma balun hosi extintor sira.

 

Kálkulu hatudu atu, iha tinan 2050, populasaun ursu polar sira nian, ne'ebé hetan ona ameasaun tanba alterasaun klimátiku halo jelu nabeen, sei tuun.

Iha Ártiku, akesimentu global bele hamosu versaun oioin iha tinan 30 nia laran, hatete hosi sienstista sira.

 

ho Lusa

horadoplaneta às 00:26 | link do post | comentar | Adicionar aos favoritos