Jigante aziátiku iha produsaun surat-tahan sei proteje ai-laran tropikál Indonézia nian

Asian Pulp and Paper (APP), empreza boot ida iha produsaun sura-tahan iha mundu, sei apoia konservasaun ba hektár millaun ida iha ai-laran tropikál iha Indonézia, hanesan dalan ida hodi hamenus impaktu ne'ebé halo hosi ninia atividade iha habitat espésie ameasadu sira hanesan orangotango, elefante no tigre.



Maibé, matenek-na'in ambiente sira no organizasaun konservasionista sira hatete katak planu sira hosi empreza boot aziátiku nian sei susar atu hala'o no sei la rezolve problema sira destruisaun habitat animál sira nian.

Prjetu konservasaun APP nian envolve kriasaun no protesaun ba moris selvajen ba espésie sira, hodi permiti katak sira sei desloka entre fatin distintu sira lahó destruisaun hosi atividade madeireiru nian iha sira ninia moris fatin, nune'e mós kriasaun ba zona tampaun sira, hodi nune'e sira ninia moris fatin sei ladún hetan estraga hosi madeireiru sira iha pelumenus área sira iha Indonézia, refere hosi Guardian. Área hamutuk hektár millaun ida ne'ebé sei hetan protesaun ekivale hanesan área ai-laran sira ne'ebé APP estraga iha tinan ikus ne'e.

APP sai hanesan alvu hosi protestu oioin Greenpeace nian no organizasaun sira seluk tanba sira ninia atividade, ne'ebé inklui utilizasaun ba ai-hun ameasadu sira iha ninia produtu. Hodi hatán, empreza hatama ona iha tinan ikus ne'e polítiku ida konservasaun ai-laran sira nian.

Hahalok konservasaun ne'ebé sei hala'o iha Indonézia halo parte iha polítika ne'e. "Loos tebes katak xave ba susesu iha esforsu sira hodi hapara desflorestasaun iha Indonézia maka abordajen ida iha nivel paizajen ba restaurasaun no konservasaun ai-laran nian. Labele konserva rai ka restaura iha izolamentu - tenki konsidera sustentabilidade iha área tomak ne'ebé haleu nia!, hatete hosi diretora sustentabilidade APP nian, Aida Greenbury.

Maski aprezenta ona projetu ne'e, APP seidauk hatete folin investimentu nian iha planu konservasaun ne'e.

Greenpeace fó kongratulasaun ba inisiativa ne'e maibé alerta mós ba impaktu limitadu sira iha planu ne'e. "Kompromisu ne'e hanesan notísia di'ak ida maibé dalan atu hala'o desflorestasaun ne'e sei naruk", afirma hosi Andy Tait, konselleiru Greenpeace nian.

Sapo TL ho Green Savers PT

horadoplaneta às 16:43 | link do post | comentar | Adicionar aos favoritos