Brazil no Indonézia sei kolabora iha área defeza no protesaun ba ai-laran sira

Brazil ho Indonézia sei asina, iha semana oinmai, akordu rua koperasaun nian iha área sira defeza no protesaun ba ai-laran sira, haktuir hosi embaixadór brazileiru iha Indonézia ba Lusa, Paulo Alberto Soares, iha loron-kinta ne'e.


Foto: Barbara Walton/Indonesia Feature Package Wildlife/EPA


Akordu iha área defeza nian ne'ebé sei asina iha loron 29 Setembru iha Brazília, Brazil, envolve defeza marítimu, aeronáutiku, treinu no tranferénsia teknolojia nian, nia adianta no hatutan katak sei hanesan oportunidade negósiu nian, iha tempu ne'ebé ekipamentu defeza nian reprezenta parte barak esportasaun brazileriu nian ba Indonézia.

Aleinde aviaun sira treinu militár Embraer nian no "roket sira" Avibras nian, Brazil bele esporta "ró sira hodi halo patrulla ba illa rihun 17 iha Indonézia", destaka hosi embaixadór.

Akrodu sei asina loron 21 hafoin tomada pose ba Prezidente indonéziu foun, Joko Widodo, ne'ebé defende aposta maka'as iha uzu tasi no transporte marítimu.

Entre loron 13 to'o 17 fulan-Outubru, iha mós Brazília, Ministériu Meiu Ambiente sei asina mós akordu ida hodi proteje no monitoriza ai-laran sira indonéziu nian, iha ámbitu REDD+, mekanizmu ida ne'ebé Nasaun Unidu lansa hodi hamenus emisaun gás sira ho efeitu ne'ebé mosu hosu desflorestasaun no degradasaun florestál nian.

Estudu ida hosi investigadór sira hosi Universidade Maryland nian ne'ebé fó sai  foin lalais ne'e hatudu katak hosi tinan 2000 to'o 2012 Indonézia lakon ona área ai-laran ho tamaña hanesan Irlanda, nune'e, ba dala uluk, halakon Brazil iha taxa desflorestasaun nian.

"Akordu ne'e iha relevánsia polítiku no estratéjiku importante ida, tanba hanesan ai-laran rua boot liu iha mundu no Brazil konsege ona teknolojia ida avansadu liu iha satelit hodi monitora ai-laran sira ne'ebé iha hetan estraga", haktuir hosi Paulo Alberto Soares.

Diplomata hatutan katak programa ne'e hakarak "halo mós ai-laranprodutivu sira lahó estraga" ka kuda fali hafoin ko'a ia sira no la interfere iha "área sira ne'ebé hanesan prezervasaun ba indíjena sira".

"Iha parte finanseiru hanesan interesante ba transferénsia teknolójiku entre nasaun emerjente rua, la halo parte iha nasaun kapitalista tradisionál iha sékulu XX - hosi Europa to'o Estadus Unidus", nia subliña.

Embaixadór brazileiru iha Indonézia adianta mós katak entre fulan-Novembru no fulan-Dezembru nasaun rua ne'e hakarak asina akordu ida koperasaun tékniku nian ne'ebé envolve transferénsia koñesimentu sira, hanesan ezemplu, iha ambiente no enerjia renovável sira, no iha área seluk siénsia no teknolojia nian.

Iha área edukasaun, hahú tinan 2012 nasaun rua ne'e kopera ona liuhosi Fundasaun ba Asosiasaun sira Nasaun Sudeste Aziátiku (ASEAN) nian no hosi Fundasaun Getulio Vargas.

Embaixadór iha esperansa katak Governu indonéziu foun sei hakotu ho blokeiu ba na'an karau brazileiru nian ne'ebé hahú iha tinan 2009, tanba Brazil esporta ba nasaun 130 no oferese presu baratu tebes duké presu sira ne'ebé pratika iha merkadu indonéziu.

Bainhira falla diálogu, esportadór boot na'an karau nian iha mundu sei kestiona formalmente ba Indonézia iha Organizasaun Mundiál Komérsiu nian, hodi defende katak rejiaun esportadór sira, livre hosi febre aftoza ho vasinasaun, laiha ligasaun ho estadu ne'ebé ninia etatutu seidauk hetan rekoñesimentu hosi Organizasaun Mundiál Saúde Animál nian.

Kona-bá na'an manu, Brazil sei aprezenta duni julgamentu formál ida ba restrisaun sira ba importasaun, hanesan "koeln tebes", hatete hosi embaixadór no nia hatutan katak nasaun bele mós "transfere teknolojia hodi hadi'a kualidade manu indonéziu nian", ne'ebé lotuk liu no ladún iha proteina duké brazileiru nian.

Indonézia hanesan parseiru prinsipál komérsiu Brazil nian iha Sudeste Aziátiku, iha tinan 2014 troka komersiál sira entre nasaun rua ne'e sei to'o dolár millaun rihun haat (euro millaun rihun 3,09), haktuir hosi diplomata.

BRazil fa'an, liuliu, aviaun sira, maibé mós soja, batar no algodaun, bainhira Indonézia ninia destake ba esportasaun ba Brazil maka óleu palma, pneu no hena sira.

ho Lusa

horadoplaneta às 12:41 | link do post | Adicionar aos favoritos