Joven ho tinan 18 harii posu sira iha fatin ne’ebé iha falta bee nian

Ninia naran Mariah Smiley, ho tinan 18 no hela iha San Antonio, iha Texas, Estadus Unidus. Maski iha ninia juventude, Mariah iha mehi boot ida: hakotu ho falta bee nian iha mundu.

 

 

Nune’e, nia harii projetu Drops of Water, ne’ebé bele lori bee moos ba nasaun subdezenvolvidu sira, liuhosi parseria hamutuk ho organizasaun sira seluk. Drops of water harii posu no bomba sira bee nian iha fatin sira ne’ebé laiha bee moos, hanesan El Salvador, ne’ebé instala ona infra-estrutura tolu.

 

Interese hosi joven norte-amerikanu ba asuntu ne’e mosu iha tinan haat liubá, bainhira, iha aula ida, deskobre katak labarik na’in ida mate iha minutu 15 ninia laran tanba laiha bee moos. “Hafoin aula, ha’u ba buka liután informasaun. Ha’u haree imajen sira maran nian no ha’u senti preokupadu, ha’u la hatene katak iha krizi ne’e”, nia esplika.

 

Nune’e maka moris Drops of Water, ne’ebé ohin iha terenu. Tuir dalan, Mariah konsege hetan ajuda hosi komérsiu local no halo leilaun sira hosi objetu sira ne’ebé nia simu. Projetu ne’e hetan koñesimentu, no iha tinan 2012, sai hanesan ONG ida ho orsamentu hamutuk euro rihun 15.

 

Hafoin hetan tiha osan, harii posu no bomba sira, joven ne’e hanorin populasaun lokál hodi uza sistema ne’e. “Ha’u haree ksolok labarik sira nian bainhira hemu bee moos no habokon ulun”, nia esplika.

 

Drops of Water iha site ida ne’ebé sidadaun ruma iha mundu bele halo ninia doasaun no sosa, inkluzivamente, artezanatu hosi El Salvador. Agora, Mariah hanoin de’it atu hakotu posu dahaat iha El Salvador, lansa livru ida, hasai ninia kursu iha Universidade Texas nian no kontinua iha organizasaun. Tanba direitu ba ema hotu hodi iha bee moos.


Sapo TL no Green Savers

horadoplaneta às 16:41 | link do post | comentar | Adicionar aos favoritos