Preokupasaun iha Díli tanba markasaun ai-hun sira hodi tesi iha sentru kapitál

Iha semana ne'e populasaun iha Díli hatudu preokupasaun ho markasaun sira iha ai-hun oioin iha sentru kapitál nian tanba tauk sai hanesan akontesimentu nebe tesi ai-hun ho tinan atus resin iha parlamentu nia oin.



Ai-hun sira iha sentru Díli nian. Foto@ AC

 

Iha semana ikus ne'e, iha marka krús mutin iha ai-hun oioin iha sentru kapitál nian, hanesan akontese iha pasadu, nebe baibain signifika katak sei tesi ai-hun sira ne'e.

Domingo Soriano, responsável ba serbisu limpeza distritu Díli nian, bainhira hatán ba Lusa kona-bá markasaun sira ne'e, konfirma katak ai-hun sira ne'e iha duni markasaun no funsionáriu sira halo tuir instrusaun hosi primeiru-ministru.

"Instrusaun sira hodi rezolve kestaun ai-hun sira ne'e mai hosi primeiru-ministru", Soriano hatete.

"Marka ona ai-hun sira ne'e maibé sei la tesi ida. Sei tesi de'it ai-hun sira nebe okupa estrada", nia garanti ona ba Lusa.

Virgílio Guterres, responsável ba Fundasaun Haburas, organizasaun ambientál antigu liu iha Timor-Leste - harii iha tinan 1998 hosi grupu ida joven timoroan sira nian - konfirma ona preokupasaun ho markasaun ba ai-hun sira ne'e, nia esplika katak nia ekipa akompaña daudaun markasaun ba ai-hun sira ne'e hahú iha tinan 2014 nia rohan.

"Kolega balun husu ona no hakarak konfirma objetivu sinál sira iha ai-hun sira ne'e. Tuir saida maka esplika ona iha distritu Díli nian, ne'e hodi identifika ai-hun sira nebe maran ka moras hodi nune'e bele tesi", nia afirma ona ba Lusa.

"Maibé hanesan iha pasadu sira tesi arbiru de'it ai-hun sira iha zona oioin, ami hakarak iha garanti atu labele akontese fali", nia hatete.

Guterres esplika ona katak iha tinan liubá organiza ona manifestasaun hodi bele evita tesi ai-hun sira nebe programadu iha sentru Díli nian, hodi esplika katak bainhira presiza sira sei halo fali asaun hanesan.

"Sira promete ona katak antes tesi ai-hun sira ne'e sei hasoru malu ho ami", nia hatete.

"Loos duni tanba iha preokupasaun ho ai-hun balun nebe besik edifísiu sira nebe iha kondisaun ladi'ak no bele monu bainhira iha tempestade ka tempu ladi'ak. Maibé la'ós de'it kona-bá ai-hun sira ne'e", nia afirma ona.

Responsável hosi Fundasaun Haburas insisti ona katak argumentu relasionadu ho fiu eletrisidade nian ka sira seluk, nebe laiha ligasaun ho seguransa rezidente sira nian, labele sai hanesan razaun hodi tesi ai-hun sira ne'e, "tanba iha alternativu sira seluk".

"Ami tenki proteje ai-hun sira. Se la'e, Díli sei sai hanesan sidade molik ida. Iha de'it fiu eletrisidade nian", nia afirma ona.

ho Lusa

horadoplaneta às 13:05 | link do post | comentar | Adicionar aos favoritos