Organizasaun ambientalistas ho sidadaun sira lansa kampaña hodi salva ai istóriku iha Dili

Organizasaun ambientalista timoroan no ne’ebé harii iha Dili, hahú hala’o kampaña hodi salva ai hirak ne’ebé kuda iha kapitál no sei atu ta’a.


 

Polémika kona-ba ai ne’ebé ezisti iha kapitál Dili, hahú iha fin janeiru bainhira komesa mosu sinál kruz kór mutin iha ai hirak ne’e ninia lolon, ne’ebé siknifika katak sei atu tesi.

 

Bainhira Lusa husu kona-ba markasaun hirak ne’e, Domingo Soriano, responsável ba limpeza distritu Dili, dehan katak tau duni marka ba ai hirak ne’e, no esplika liu tan katak funsionáriu hirak ne’e halo tuir instrusaun primeiru ministru, Xanana Gusmão nian.

 

“Instrusaun atu hodi rezolve problema kona-ba ai sira ne’e, hatuun hosi primeiru ministru”, dehan Soriano.

 

“Sei tau marka ba ai hirak ne’e, maibé la’os atu tesi. Ba de’it ai hirak ne’ebé okupa estrada”, hatutan Soriano ba Lusa.

 

Husu kona-ba saida maka sei bele akontese ba ai hirak ne’e hodi hamosu kampaña bot ida iha grupu facebook nomós rede sosiál seluk, hodi hato’o uluk pedidu no tuir maka halo kampaña sensibilizasaun iha dalan-dalan.

 

Elementu hosi organizasaun ambientál oioin no ne’ebé ezisti iha Dili maka taka kartaz ba iha ai hirak ne’ebé tau ona sinál mutin no sira mós halo asaun sensibilizasaun ba populasaun sira.

 

"Husik ha’u no ha’u sei fó mahon ba ó. Fatin matak malirin, no moris saudavel", hanesan fraze balun ne’ebé hakerek ho tétum no inglés ne’ebé hakerek iha kartaz hodi taka ba ai hirak ne’e ninia lolon.

 

 Ho asaun 500 resin no asinatura 300, sirkula mós karta aberta ida hosi Fundasaun Haburas, nu’udar organizasaun ambientál ida ne’ebé antigu liu iha Timor-Leste, harii hosi grupu jovens ida iha tinan 1998.

 

"Ami preokupa ho ai hirak ne’ebé sei atu tesi hanesan ai hun bobot ne’ebé tesi liu ona. Ai hirak ne’e kuda durante tempu koloniál portugés. To’o okupasaun indonézia no fai hirak ne’e fó ona mahon ba ema iha Dili", tuir karta ne’ebé asina hosi Virgílio Guterres, responsável Haburas.

 

Guterres dehan ba Lusa katak desde tinan kotuk, organiza ona manifestasaun to’o konsege evita tesi ai iha Dili-laran, no esplika liu tan katak karik presija bele foti medida hanesan.

 

SAPO TL ho Lusa

horadoplaneta às 05:38 | link do post | comentar | Adicionar aos favoritos