Unidade hodi transforma foer ba enerjia hahú harii iha besik sidade Díli

Projetu hodi harii unidade ida ba tratamentu foer nian no ba nia transformasaun ba enerjia, ho sentrál ida 25MW lansa ona iha loron-sesta ne'e iha serimónia ida iha Tibar, zona nebe instala lixeiru Díli nian.


Foto: Epifânio Sarmento/ SAPO TL


 

Projetu hodi harii unidade ida ba tratamentu foer nian no ba nia transformasaun ba enerjia, ho sentrál ida 25MW lansa ona iha loron-sesta ne'e iha serimónia ida iha Tibar, zona nebe instala lixeiru Díli nian.

 

Bainhira ko'alia iha serimónia lansamentu ba projetu, nebe sei dezenvolve hosi empreza ida hosi Taiwan, xefe Governu, Rui Maria de Araújo, hatete katak unidade hatán ba preokupasaun hosi ezekutivu kona-bá ambiente no jestaun ba rezíduo urbanu sira nian.

 

"Timor-Leste halo daudaun diretivu sira hodi hetan solusaun ba kestaun sira ne'e, promove estratéjia ida jestaun foer sira nian nebe preokupa tebes, la'ós de'it ba nia rekolla maibé mós ba nia tratamentu to'o nia reutilizasaun", nia destaka.

 

"Tanba ne'e, ha'u bele senti de'it satisfeitu tanba konkretiza hakat importante ida ba ita nia nasaun, hanesan lansamentu ba projetu inovadór ida nebe hanoin kleur ona no ohin loron sai realidade", nia hatutan.

 

Iha fulan-Novembru tinan liubá Governu timoroan aprova ona rezolusaun ida ho "akordu prinsípiu nian" ho proposta investimentu nebe aprezenta hosi empreza taiwanés Shun Hsin Construction Development Ltd hodi harii "unidade industriál ida ba tratamentu foer iha Tibar".

 

Testu rekoñese katak "kresimentu populasaun nian, kresimentu sidade sira nian no konsumu, kontribui hodi estraga kondisaun ambientál sira, liuliu iha zona urbanu sira" nune'e maka "urjente medida ida ba tratamentu poluisaun nian".

 

Projetu, nebe sei fó empregu hamutuk 300, sei halo rekolla no armazenamentu ba foer sira, no mós tratamentu no reutilizasaun ba rezíduo orgániku sira.

 

Rui Araújo destaka importánsia hosi tratamentu ba foer nian ba saúde públiku hodi konsidera katak unidade iha Tibar hanesan "hakat importante ida iha dezenvolvimentu sustentável" Timor-Leste nian.

 

"Sustentabilidade ambientál implika ita foti desizaun sira no hodi halo asaun nebe proteje natureza, halo meiu ambiente favorável ida ba dezenvolvimentu ema nian iha harmonia ho kriatura moris sira seluk", nia afirma.

 

Estudu ida nebe publika iha 2014 hosi Banku Aziátiku ba Dezenvolvimentu (BAD) fó sai katak loron-loron iha Timor-Leste iha foer tonelada 120 foer nian maka to'o iha lixeiru, nune'e jestaun ba rezíduo urbanu hanesan dezafiu ida ba autoridade sira kapitál nian.

 

"Bainhira laiha kapasidade hodi transforma foer, ho aumentu populasaun nian, dezenvolvimentu hosi setór sira indústria nian, komérsiu, agrikultura ho infraestrutura no kresimentu ekonómiku asosiadu ba kbiit maka'as sosa nian nebe maka ita hamosu, volume ne'e bele to'o tonelada 500", destaka hosi artigu ne'e.

 

"Bainhira ita la hala'o asaun konkretu sira hodi hasoru ho situasaun ne'e, entaun ita sei iha dezafiu boot ida iha futuru", nia konsidera. Rui Araújo destaka ona faktu hosi projetu "transforma foer iha enerjia" no faktu hosi rekolla, prosesamentu no sunu foer sira, hamenus númeru parazita no moras sira nian. "Bainhira ita hili tratamentu ba foer sira hanesan ne'e, ita mós hamenus estraga sira, liuhosi rekuperasaun enerjétiku, transforma foer iha sasán di'ak ruma nebe maka hanesan enerjia", nia hatete.

 

"Estasaun tratamentu ba foer ne'e bele halo enerjia ba sentral elétriku ida ho kapasidade 25MW, hodi hatán ba nesesidade lokál sira enerjia nian ba benefísiu komunidade nian", destaka mós.

 

ho Lusa

horadoplaneta às 14:50 | link do post | comentar | Adicionar aos favoritos