Mosambike no Tanzánia asina akordu ba protesaun ambientál

Governu mosambikanu no tanzanianu asina ona iha Maputo akordu ida ba protesaun ambientál fauna nian iha Área Konservasaun Transfronteirisu Rezerva Niassa nian no iha Rezerva Selous nian.

 

 
"Nasaun rua ne'e hanesan fatin ba hahalok sira hosi kasadór klandestinu sira, nebe uza koredór hosi ami nia fronteira sira hodi tranzasionár marfin no rekursu sira seluk ho dalan ilegál", hatete hosi ministru Rai, Ambiente no Dezenvolvimentu Rurál hosi Mosambike, Celso Correa, nebe haktuir hosi diáriu O País iha loron-tersa ne'e.

Akordu, nebe asina iha loron-segunda entre governante mosambikanu ho ministru Rekursu Naturál no Turizmu hosi Tanzánia, Lazaro Nyalandu, hakarak harii plataforma ida koperasaun nian hodi garanti protesaun ba biodiversidade, kombate atake nebe mosu beibeik hodi kasadór klandestinu sira iha rejiaun.

Ministru Rekursu Naturál no Turizmu hosi Tanzánia konsidera katak ekosistema nebe iha área transfronteirisu entre rezerva sira Niassa ho Selous reprezenta "santuáriu ida ba rekursu ai-laran sira nian", destaka nia importánsia ba kontinente afrikanu.

"Ita ko'alia kona-bá rai ho kilómetru rihun 15, área ida nebe hanesan ho teritóriu belga, hanesan ezemplu. Ekosistema nebe iha área ne'e hamutuk konstitui símbolu ida moris nian iha ita nia nasaun sira", Lazaro Nyalandu hatete no hatutan katak populasaun hosi elefante sira iha Rezerva Selous nian tuun maka'as tanba hahalok sira hosi kasadór klandestinu sira.

Mosambike hanesan fatin ida ba kontrabandu marfin no xifre sira hosi rinoseronte sira ho destinu ba Ázia, iha negósiu ida nebe, tuir organizasaun ambientalista oioin nebe atua iha nasaun ne'e, maka halo ho komplasénsia hosi autoridade lokál sira.

Tuir informasaun hosi Wildlife Conservation Society, organizasaun norte-amerikanu ida ba protesaun ambientál nian, populasaun elefante nia tuun ba metade iha Mosambike iha tinan lima nia laran no 95% hosi populasaun mate iha norte nasaun nian, iha besik fronteira ho Tanzánia.

ho Lusa

horadoplaneta às 15:29 | link do post | comentar | Adicionar aos favoritos