Kasadór sira oho metade elefante sira Mosambike nian iha tinan lima nia laran

Estudu foun ida hosi Wildlife Conservation Society, nebe apoia hosi Governu Mosambike nian, hatudu katak kasadór ilegál sira oho kuaze metade hosi elefante sira iha nasaun ne'e tanba nia marfín iha tinan lima ikus ne'e.


 

Populasaun elefante nia tuun ba 48%, nebe hanesan diminuisaun ida hosi animál 20.000 ba animál 10.300. "Númeru tuun ne'e relasionadu ho kasa nebe maka'as hasoru animál sira ne'e iha nasaun", bele le iha dokumentu hosi organizasaun internasionál, nebe haktuir hosi Guardian.

 

Zona remota sira hosi norte Mosambike nian, nebe inklui Rezerva Nasionál Niassa, sai hanesan zona nebe afetadu liu no koresponde ba 95% hosi elefante sira nebe mate no rejista iha períudu tempu ne'e. Populasaun iha rejiaun ne'e tuun hosi 15.400 ba 6.100 elefante.

 

Númeru elefante sira nebe mate aas tebes iha zona ida ne'e mosu tanba kasadór sira nebe to'o hosi Tanzánia, nebe populasaun elefante sira nia lakon tiha ona. "Problema boot maka governasaun. Norte sai nafatin hanesan área ida kiak no remota, nível alarmante ida ba korupsaun", hatete hosi diretór Wildlife Conservation Society iha Mosambike, Alastair Nelson. "Polísia balun iha norte no iha fronteira simu osan no dalaruma empresta sira nia arma ba kasadór sira", nia hatutan.

 

Tinan-tinan iha besik elefante 30.000 resin maka mate iha Áfrika, nebe hodi hametin komérsiu ilegál marfin nian. Populasaun elefante atuál afrikanu nian maka hamutuk animál 470.000. Iha sékulu liubá, númeru ne'e sa'e ba millaun resin.

 

ho Green Savers

horadoplaneta às 11:50 | link do post | comentar | Adicionar aos favoritos