Movimentu Tasi Mos

Movimentu Tasi Mos ne’ebé lidera hosi Gally Soares Araújo, timor-oan no organiza hosi foin sa’e timor-oan sira, nu’udar movimentu ne’ebé hala’o hodi promove konsiensializasaun iha sosiedade timor-oan ninia leet atu labele so’e fo’er arbiru iha tasi-ibun hirak ne’ebé ema sempre vizita bá no presija atu hamoos duni fatin hirak ne’e tanba Estadu laiha kontratu kona-ba limpeza iha fatin refere, no liu-liu tanba ema sira ne’ebé ba hariis tasi ladauk iha konsiensia hodi halo prezervasaun ba ambiente.

 

Objetivu hosi grupu ne’ebé hala’o movimentu limpeza ne’e ho maneira informál no espontánea, maka “hatudu” ba sidadaun sira katak hala’o buat kiik ida, liu hosi rekolla lixu iha tasi-ibun ne’ebé grupu refere eskolla kada semana, bele hamosu buat foun ida ka diferensa ida.

                                     Foto: Movimento Tasi Mos

 

Bazeia ba intervensaun dahaat iha Tasi Dolok Oan, Movimentu Tasi Mos insentiva ona ema hothotu atu halo parte (hahú hosi timor-oan to’o estranjeiru sira), alénde ne’e fó hatene mós kona-ba prátika di’ak hodi prezerva ambiente liu hosi sira-ninia pájina Facebook.

 

                                                         Foto: Movimento Tasi Mos

 

Oras ne’e daudaun movimentu refere hetan ona apoiu hosi entidade hanesan GSA Company, Wemori, Leader Supermarket ho Páteo.

 

Responsável hosi Movimentu Tasi Mos, Gally Soares Araújo dehan katak dalan sei naruk atu ema hothotu partisipa, maski sei iha difikuldade seluk hanesan inkonsisténsia nomós ladun hetan kontribuisaun hosi ema balun, hodi ikus mai hamosu atrazu ba iha prosesu rekolla lixu nomós tanba ema barak maka ladauk hatene atu so’e fo’er iha ninia fatin, hodi so’e de’it garafa bee nomós hahan restu iha tasi-ibun.

 

                                                     Foto: Movimento Tasi Mos

 

“Maski nune’e sempre ho hanoin otimismu ida ba futuru, tanba ami konsege hamoos ona tasi ibun hosi parte Dolok Oan, maibé ha’u mós bolu ona atensaun ba entidade sira ne’ebé hala’o eventu motocross no bisikleta atu foti medida prevensaun no labele hafo’er tasi ibun ho plástiku nomós lixu orgánika seluk”.

 

                                  Foto: Movimentu Tasi Mos

 

Hatene liu tan no halo parte ba Movimentu Tasi Mos iha ne’e:

 

https://www.facebook.com/groups/962950070415874/?fref=ts

horadoplaneta às 07:53 | link do post | comentar | Adicionar aos favoritos