Rai-maran iha Mosambike halo ema rihun 135 moris iha situasaun inseguransa alimentár

Rai-maran iha parte súl Mosambike nian afeta ema 135.000, moris tebes iha situasaun inseguransa alimentár, hatete horisehik ba Lusa, portavós hosi Institutu Nasionál Jestaun Kalamidade (INGC).


 

"Ami halo levantamentu no deskobre katak situasaun krítika tebes iha provínsia Gaza no Inhambane [parte súl nasaun nian], afeta ema rihun 138 ", hatete Rita Almeida, iha rohan hosi reuniaun Konsellu Tékniku Emerjénsia Mosambike nian iha Maputu.

 

Hafoin period udan-boot, entre outubru no abril, Mosambike sei afeta hikas hosi kalamidade, rai-maran ne’ebé atinji provínsia iha parte súl nasaun nian, hamosu problema ba atividade agríkola, baze subsisénsia populasaun sira-nian iha zona rekóndita, iha ne’ebé mosambikanu sira hela barak.

 

Tuir dadus ofisiál ne’ebé aprezenta durante reuniaun, jeralmente, setór agráriu iha Mosambike lakon ektare rihun 171 hosi kultura oioin, koresponde ho 3% hosi área ne’ebé kuda ona, hosi sira ne’e 2% destroi hosi udan-boot iha sentru no iha parte norte nasaun nian no 1% larezisti ba rai-maran iha parte súl Mosambike nian.

 

"Iha risku rai-maran atu afeta provínsia sira seluk no, tanba ne’e, ami rejista mós kazu inseguransa alimentár iha zona sira ne’e", adverte Rita Almeida, maibé konsidera katak ambisaun Konsellu Tékniku Emerjénsia maka hadia situasaun família sira ne’ebé afeta iha loron hirak tuir mai.

 

Hanesan forma atu hatan ba nesesidade populasaun sira ne’ebé afetadu, tuir Rita Almeida, Governu mosambikanu sei hala’o planu asisténsia alimentár, ho atensaun espesiál ba provínsia Gaza, ne’ebé presiza tanke bee 22 resin, ho kapasidade litru rihun lima ba populasaun sira.

 

"Ami reforsa provínsia Gaza ho tanke bee, liuliu ba distritu Chigubo no mós Chokwé, ne’ebé sei abastese zona sira seluk", hatete portavós INGC, hatudu katak iha loron hirak tuir mai INGC sei haruka tanke sanulu ba provínsia ne’e.

 

Distritu Chigubo maka atinjidu liu to’o oras ne’e, família 2.500 resin afeta hosi rai-maran no gadu 5.000 resin maka lakon.

 

SAPO TL ho Lusa        

horadoplaneta às 06:31 | link do post | comentar | Adicionar aos favoritos