Nível tasi nian sa'e iha médiu sentímetru ualu hahú 1992

Tasi-ibun sira hosi Ázia no Oseánia, iha Pasífiku, hanesan mós Mediteráneu Orientál no tasi-ibun atlántiku Amérika nian, sai hanesan fatin nebe prejudikadu liu. Akesimentu globál sai hanesan suspeitu prinsipál.

 

Foto: AC


Nível tasi nian sa'e, iha média, besik sentímetru ualu iha mundu tomak hahú tinan 1992 tanba akesimentu globál. Konkluzaun ne'e hato'o hosi NASA, nebe alerta katak nível ne'e sei mantén iha tinan hirak tuirmai.

Grupu ida ho sientista sira hosi ajénsia espasiál norte-amerikanu aprezenta ona, iha loron-kuarta ne'e, informasaun foun sira nebe hetan kona-bá aumentu ba nível tasi nian iha mundu tomak - nebe, iha média, aas liu sentímetru 7,62 hosi 1992 -, maski varia iha fatin oioin iha mundu, no zona balun to'o iha sentímetru 22.

NASA publika mós vídeo ida ho informasaun nebe hetan hosi nia satelit sira nebe hatudu loloos, liuhosi gradasaun kór sira nian, saida maka evolusaun iha parte ida-idak iha mundu iha tinan 23 ikus ne'e.

Tasi-ibun sira hosi Ázia no Oseánia, iha Pasífiku, hanesan mós Mediteráneu Orientál no tasi-ibun atlántiku Amérika nian, sai hanesan fatin nebe prejudikadu liu tanba nível tasi nian nebe sa'e.

Akesimentu globál, nebe dalabarak mosu tanba atividade hosi ema moris, sai hanesan suspeitu prinsipál ba aumentu nível oseanu no tasi sira nian, sai hanesan responsável ba glasiár sira nebe nabeen no ba aumenta temperatura iha bee nian.

"Loos tebes katak situasaun sei sai aat liu iha futuru", alerta hosi Steve Nerem, jeofíziku hosi Universidade Colorado, durante aprezentasaun ba informasaun sira ne'e.

Sientista sira alerta ona katak maski foti medida hodi tenta muda situasaun no karik bele muda tendénsia, sei presiza sékulu barak hodi fila ba nível antigu sira bainhira seidauk akontese alterasaun klimátiku.

Nível tasi nian sa'e iha futuru hamosu risku ba sidade no povoasaun oioin nebe hela besik tasi-ibun iha mundu tomak, nune'e bele halo illa sira hosi mapa no, iha kazu Pasífiku nian bele halakon nasaun sira hotu.

ho Renascença

horadoplaneta às 12:43 | link do post | comentar | Adicionar aos favoritos