Labarik ho tinan 10 sei pasa tinan 2013 toba iha tenda iha ár livre

Iha fatin dook iha Pensilvánia, iha Estadus Unidus, labarik-mane abisiozu ho tinan 10 rezolve ona monta tenda ida iha kintál no toba iha ne’ebá kalan-kalan, durante tinan ida. Misaun ne’e hahú iha pasajen tinan nian, sai hanesan rezolusaun tinan foun ne’ebé la hanesan baibain no iha dezafiu.

 

 

L.R.C (aman-inan sira lakohi nia uza naran loloos) hanesan labarik ida hakmatek maibé la dezisti ba esplorasaun rekursu naturál sira ne’ebé akontese ohin loron. Maibé ninia aventura la’ós de’it ba kauza ambientál sira nian.

 

“Iha inísiu hanesan dezafiu ida. Ha’u hahú akampa iha loron 26 fulan-Dezembru ho tempestade jelu maka’as no hanesan emosionante. Hahú bainhira ha’u hakarak akampa durante semana ida hahú iha loron dahuluk tinan foun nian”, labarik-mane ne’e esplika.

 

Hosi semana ida ba fulan ida. Nune’e nia hahú gosta no senti katak ladún difisil, nia hanaruk dezafiu ne’e ba tinan ida. Hafoin aman-inan sira rekupera hosi xoke revelasaun nian, sira fó korajen ba nia hodi fahee esperiénsia iha blog ida. Partilla dahuluk iha blog maka – “Malirin hela!” – akontese iha loron 23 fulan-Janeiru 2013. Hafoin iha mensajen liu 100 no asesu rihun 13 hosi nasaun barak, L.R.C laiha planu atu aruma tenda.

 

Hanesan labarik sira ho tinan 10, toba mesak dalaruma ladún konfortável – no iha ne’e nia tenki hasoru mesak ninia tauk no aflisaun sira. Saida maka hatauk nia maka lian sira iha kalan – karik hosi ema sira nian ka asu-fuik sira, ne’ebé nia toman ona.

 

Iha aventura ne’e, iha regra auto-imposta sira hosi aventureiru ki’ik ne’e: labele toba hafoin kalan-boot, labele tama iha uma antes tuku 4:45 no, hafoin iha ona kama leten, labele fila fali ba uma laran. Baihira senti manas iha tenda laran, labele ba uma atu hamahan aan. Nune’e mós bainhira senti malirin, labele ba iha uma laran hodi hamanas isin.

 

Dalabarak, ninia aman ba hamutuk ho nia. Ne’e ninia inan maka obriga bainhira temperatura sira tun ba -20ºC.

 

 

Determinasaun ida ne’e – liuliu iha temperatura ki’ik sira ne’ebé senti iha Invernu – halo mosu pergunta tansá maka labarik-mane ne’e iha nafatin ninia misaun. Tuir espesialista sira, resposta ne’e bele hetan iha rede apoiu nian – aman-inan sira, belun sira no rede online. Labarik ida mesak la konsege iha hahalok hanesan ne’e.

 

Istória ne’e destaka importánsia interasaun familiár nian, hatudu oinsá adultu sira bele tulun hodi harii identidade ambientál ida iha labarik sira, insentiva sira hodi halimar, aprende no moris iha natureza. Sei falta fulan neen.

 

Sapo TL no Green Savers

horadoplaneta às 12:56 | link do post | comentar | Adicionar aos favoritos