El Nino bele hamosu iha 2016 brankeamentu aat liu korál nian iha istória

Korrente ekuatoriál manas ida nebe mosu iha Pasífiku, relasionadu ho El Nino, bele hamosu iha 2016 epizódiu aat ba brankeamentu korál iha istória, alerta hosi investigadór australianu sira iha loron-kinta ne'e.


 

Sientista sira hosi Universidade Queensland (Austrália) no hosi Ajénsia Oseániku no Atmosfériku Norte-amerikanu nian (NOAA, sigla lian inglés) esplika iha estudu ida nebe hatete de'it ba dala tolu maka sei akontese akontesimentu ida haneasn ne'e no resife sira hanesan Great Barrier Reef australianu nian sei afetadu liu.

 

"Bainhira kontinua aat nafatin, Great Barrier Reef sei hetan brankeamentu jeneralizadu ida ho mortalidade inerente tanba konsekuénsia hosi elevasaun beibeik hosi nivel temperatura tasi been nian", hatete hosi Ove Heogh-Guldberg, diretór hosi Institutu Alterasaun Globál hosi Universidade australianu nian.

 

Durante epizódiu dahuluk hosi brankeamentu globál nian, nebe rejista iha 1998, "metade hosi Great Barrier Reef, nebe klasifika hanesan patrimóniu Humanidade nian, afetadu no korál entre 5% to'o 10% mate ona, nia hatete. Ba dala rua akontese iha 2010, hafoin tempestade sira nebe aumenta stress nebe manas hamosu.

 

 

Fenómenu brankeamentu korál nian akontese bainhira, tanba temperatura hosi bee oseanu nian sa'e, korál sira hasai ho forsa alga simbiótiku sira nebe moris iha sira nia kulit, hodi hamosu kolorasaun iha korál sira. Auzénsia naruk hosi alga sira ne'e halo pólipo korál sira mate.

 

"Recife bele la hetan hipóteze iha 2016", alerta hosi Heogh-Guildberg, hodi hatutan katak Great Barrier Reef iha kilómetru kuadradu rihun 345, iha sistema karolinu hamutuk rihun tolu resin no illa tropikál millar ida resin.

 

Foin lalais, Governu australianu konsege evita ona atu UNESCO hatama Great Barrier Reef iha lista ba patrimóniu sira nebe iha perigu, hafoin hala'o tiha planu ida prezervasaun nebe sei halo iha tinan 35 tuirmai.

 

Resife karolinu sira nebe lakon iha impaktu importante tebes iha ekosistema tasi nian, tanba hanesan korál sira nebe fó hahán no fatin ba espésie oioin hosi ikan no krustáseu sira. Iha 1998, resife koralinu afetadu iha nasaun tropikál 60.

 

Fenómenu atuál hosi El Nino, nebe mosu fali iha fulan-Marsu ne'e, karik sei mosu to'o primavera 2016 nian no bele sai hanesan ida nebe maka'as liu, haktuir hosi investigadór no sientista norte-amerikanu sira.

 

El Nino hanesan fenómenu iregulár ida, nebe hamosu aumentu iha temperatura bee sira nian iha Pasífiku, udan boot iha zona balun, rai-maran iha zona sira seluk no anin nebe fraku. Sientista sira suspeitu katak akesimentu globál bele aumenta mós ho frekuénsia hosi El Nino.

 

ho Lusa

horadoplaneta às 16:38 | link do post | comentar | Adicionar aos favoritos