Loron Internasionál hodi Halakon Kiak 2015

Loron Internasionál hodi halakon Kiak selebra iha loron 17 fulan-Outubru.

 

 

Loron ne'e komemora ofisialmente ba dala uluk iha 1993, ho objetivu fó alerta ba populasaun ba nesesidade hodi defende direitu báziku ema nian.

Buat hotu hahú iha loron 17 fulan-Outubru 1987 bainhira Joseph Wresinski, fundadór hosi Movimento Internacional ATD ( Ajuda a Toda a Desgraça) Quarto Mundo, organiza iha Paris reuniaun ida hodi hanoin vítima sira hosi hamlaha no kiak nian, iha fatin nebe uluk asina tiha Deklarasaun Universál Direitu Ema nian. Ema rihun 100 maka hatán ba nia apelu.

Informasaun sira nebe UNESCO fó sai hatudu katak ema millaun 842 sei iha hamlaha maka'as entre tinan 2011 no 2013. Asembleia Jerál ONU nian, liuhosi rezolusaun 47/196, dezigna loron ne'e ho hanoin hodi promove konsiensializasaun kona-bá nesesidade hodi halakon kiak iha mundu. Halakon kiak mosu iha sentru hosi Objetivu sira hosi Dezenvolvimentu Miléniu nian (ODM) no hosi Objetivu foun sira hosi Dezenvolvimentu Sustentável.

"Harii futuru ida sustentável: Hamutuk hodi hakotu ho kiak no diskriminasaun" maka tema ba Loron Internasionál hodi Halakon Kiak 2015. "Iha loron ne'e ita hotu hanoin, desidi no halo atuasaun hamutuk hasoru kiak maka'as, no harii mundu ida nebe labele husik ema ida ba kotuk. Ita nia objetivu maka prosperidade ba ema tomak no la'ós de'it ba ema balun", hatete hosi Ban Ki-moon, Sekretáriu Jerál ONU nian, iha nia mensajen espesiál ba loron ne'e.

@SAPO Timor-Leste

horadoplaneta às 21:49 | link do post | comentar | Adicionar aos favoritos