ONU konsidera katak redusaun sira iha emisaun gás nian hanesan "la sufisiente"

Iha loron-sesta ne'e ONU konsidera ona katak redusaun hosi gás poluente sira iha atmosfera nebe nasaun sira kompromete voluntáriu hanesan "la sufisiente" hodi limita subida hosi temperatura globál iha valór ki'ik liu sentígradu rua.


 

Avizu ne'e mai hosi sekretária-jerál hosi Konvensaun Kuadru hosi Nasaun Unidu kona-bá Alterasaun Klimátiku (UNFCCC, iha sigla lian inglés), Christiana Figueres, bainhira aprezenta, iha Berlim, rezumu hosi planu nasionál sira, hosi nasaun 146, hodi kombate akesimentu globál.

 

Figueres, nebe ajénsia EFE haktuir, esplika katak, bainhira komunidade internasionál la hasoru hamutuk no ho determinasaun, temperatura média globál sira bele sa'e entre grau haat no lima sentígradu to'o 2100, ho baze hosi estimativu sira nebe halo foin lalais ne'e hosi Ajénsia Internasionál ba Enerjia (AIE).

 

Responsável hosi UNFCCC hatutan katak, maski nasaun 146 implementa maka'as medida sira nebe sira aprova ona, temperatura nebe sa'e sei to'o grau 2,7, signifika katak redusaun sira nebe proposta "la sufisiente".

 

"Hanesan notísia di'ak ida, hakat di'ak ida no notável iha diresaun loloos hodi hapara subida temperatura sira no lori ba liña defeza nian ho grau rua, maibé ne'e seidauk to'o ida", nia hatutan.

 

Maibé, Figueres destaka ona "kompromisu loloos nebe lahó presedente" hosi komunidade internasionál, tanba nasaun industrializadu sira "lahó esepsaun" hanesan mós hosi 75% hosi nasaun emerjente sira, aprezenta ona planu hodi hamenus emisaun gás sira ho efeitu estufa nian, "nebe hanesan istóriku".

 

Relatóriu sínteze kona-bá efeitu hamutuk hosi kontribuisaun sira determinadu nasionalmente, aprezenta hosi Figueres, mosu fulan ida antes hahú Simeira kona-bá Klima, nebe sei hala'o iha Paris, no nebe hakarak hetan akordu globál ida no vinkulativu hodi kombate alterasaun klimátiku sira.

 

ho Lusa

horadoplaneta às 13:48 | link do post | comentar | Adicionar aos favoritos