Kompozisaun kímiku hosi Tasi Glasiár Antártiku sei muda lalais - estudu

Kompozisaun kímiku hosi Tasi Glasiár Antártiku sei muda lalais tanba aumentu hosi konsentrasaun dióksidu karbonu iha atmosfera, no ba kriatura ki'ik sira, nebe forma baze hosi kadeia hahán nian, sei lakon tanba bee nebe sai ásidu maka'as.


 

Investigasaun foun nebe halo hosi ekipa sira hosi universidade norte-amerikanu sira hosi Havai ho Alaska, publika iha edisaun loron-segunda hosi revista Nature Climate Change, refere katak, ba organizmu balun, inisíu hosi situasaun krítiku ne'e bele sai fatal no, bainhira ne'e kontinua nafatin, nia adaptasaun "sei la possivel".

 

Peskiza uza modelu oioin hodi esplora forma sira hanesan absorsaun hosi dióksidu karbonu antrópiku - nebe mosu hosi atividade ema nian - no subsekuente asidifikasaun nebe sei afeta Tasi Glasiár Antártiku iha sékulu tuirmai.

 

Organizmu mariñu ida nebe hetan ameasa tanba bee nebe sai ásidu maka'as maka molusku pterópode sira, karakól ki'ik sira nebe sai hanesan hahán báziku ba ikan sira, baleia sira no manu tasi sira nian.

 

"Oseanu atua hanesan esponja boot ida nebe xupa dióksidu karbonu sira nebe barak liu hosi atmosfera. Prosesu ne'e konsome ion karbonatu sira, importante ba organizmu balun hodi harii no mantén sira nia konxa karbonatu kálsiu nian", esplika hosi Claudine Hauri, peskizadór-xefe no oseanógrafu kímiku, nebe estuda kompozisaun hosi ambiente tasi nian no interasaun sira hosi espésie kímiku sira ho atmosfera.

 

"Dalan úniku hodi hamenus risku nebe asidifikasaun hosi oseanu sira hamosu ba moris mariñu nian no ita nia fonte hahán nian maka hamenus emisaun sira hosi dióksidu karbonu nian", hatutan hosi ko-autór estudu nian, Axel Timmermann, nebe haktuir hosi ajénsia EFE.

 

ho Lusa

horadoplaneta às 14:39 | link do post | comentar | Adicionar aos favoritos