Malázia kompromete atu redús emisaun karbonu ba 40% to’o 2020

Ministru Rekursu Naturál no Meiu Ambiente Malázia nian, Wan Junaidi, afirma katak nia nasaun kompromete atu redús emisaun karbonu ba 40% to’o tinan 2020, hakerek imprensa lokál horisehik.



Planu ne’e sei detalla liu iha semana oin iha Konferénsia Internasionál kona-ba Alterasaun Klimátika, ne’ebé hahú iha Paris iha loron-segunda to’o loron 11 dezembru, ne’ebé sei partisipa hosi nasaun 160 resin.


"Ami hakarak konserva floresta ektare millaun iha ill Bornéu", tenik ministru ne’e, iha entrevista ba Channel News Asia.


Tuir Wan Junaidi, Malázia sei kria lei ne’ebé rigorozu hodi hapara esplorasaun ai ilegál no proteje biodiversidade iha nia territóriu. Governante ne’e halo mós promesa atu utiliza kombustível ne’ebé ladun poluente.


Krítiku sira governasaun nian akuza Governu malaiu la iha planu hodi utiliza enerjia renovável no asegura katak kuaze metade hosi enerjia mak nasaun konsumu iha tinan ne’e mai hosi karvaun, ne’ebé emite CO2 ho kuantidade boot ba atmosfera.


Akordu mak hala’o iha Paris sei substitui protokolu Quioto no pretende estabelese meiu ida atu temperatura planeta nian la sa’e liu grau sentigradu rua.


SAPO TL ho Lusa

horadoplaneta às 01:50 | link do post | comentar | Adicionar aos favoritos