Reinu Unidu entrega millaun euro 14 ba kombate "El Niño" iha Mosambike

Reinu Unidu  sei disponibiliza   millun libra 11 (millaun euro 14) ba Mosambike atu kombate fenómenu "El Niño" no dezastre  klimátiku hanesan  rai-maran no menus  produsaun  agríkula, anunsia  horisehik iha  Maputu hosi fonte ofisiál  britániku.



"Ami hakarak apoiu ba sira ne’ebé hetan  afetadu  hosi fenómenu 'El Niño' iha Mosambike, ami preokupa tebes  ho situasaun ne’e", hatete Nick Hurd, ministru hosi Departamentu ba Dezenvolvimentu Internasionál britániku, ne’ebé hato’o  iha  imprensa hafoin hala’o enkontru ida ho ministru Negósiu Estranjeiru no Kooperasaun mosambikanu, Oldemiro Baloi.
 
Valór  ne’e reprezenta iha  aumentu millaun libra ida, kompara ho kuantia ne’ebé  Reinu Unidu ajuda  iha estratéjia ba kombate fenómenu nian  iha Mosanbike  dezde  tinan 2012.

Ministru britániku ne’e hatutan tan katak apoiu foun hosi Reinu Unidu foka liu iha área asesu bee mós no saneamentu, eskolla sai esensiál ba bem-estar povu nian, iha  momentu ne’ebé fatin balun iha sul nasaun hasoru ona  situasaun rai-maran.

"Ita hotu nia hakarak maka povu mosambikanu bele moris iha  kondisaun di’ak ", hatutan  ministru britániku, ne’ebé mantein moos enkontru ida ho xefe Estadu mosambikanu, Filipe Nyusi.

Durante iha primeiru dia  nia vizita ba loron rua iha Mosambike, Nick Hurd asina ona memorandu ida iha área enerjia renovável ho  ministru Rekursus Minerais no Enerjia mosambikanu, Pedro Couto, akordu ida ne’ebé prevé atu governu rua bele  promove ninia uzu ba fonte ne’e iha nasaun afrikanu.

"Ami hakarak kolabora atu aselera asessu ba enerjia iha Mosambike", afirma governante britániku , hodi fó-sai importánsia iha uzu enerjia renovável ba territóriu boot hanesan  mosambikanu.

Ministru britániku ne’e moos hato’o ninia preokupasaun ba krize polítika no militar entre Governu no  Resistência Nacional Moçambicana (Renamo), situasaun ida ne’ebé  akontese iha fulan hirak ikus ne’e, tamba partidu boot opozisaun nian rezeita atu simu rezultadu eleisaun jerál 2014.

"Situasaun polítika iha Mosambike preokupasaun ita hotu nian no hakarak tebes atu haree  problema liu lalais tiha", hato’o Nick Hurd, no hatutan tan katak ida ne’e moos sai hanesan tema ida iha enkontru ho xefe diplomasia mosambikanu.

SAPO TL ho Lusa

tags:
horadoplaneta às 08:03 | link do post | comentar | Adicionar aos favoritos