Quinta-feira, 29.06.17

Alterasaun klimátiku bele aumenta iha 25% área lahó jelu hosi Antártida iha 2100

Investigasaun ida ne'ebé publika iha loron-kinta ne'e fó sai katak alterasaun klimátiku bele aumenta iha 25% ba área sira lahó jelu hosi Antártida iha sékulu nia rohan, senáriu ida ne'ebé sei hamosu mudansa maka'as tebes iha biodiversidade hosi kontinente. 

 

 

Foto@ Felipe Trueba /EPA

 

Zona lahó jelu reprezenta agora daudaun besik 1% hosi superfísie kontinente nain - ne'ebé área total maka besik millaun 14 kilómetru kuadradu -, sai nune'e hanesan fatin ne'ebé konsentra kuaze hosi nia fauna no flora.

 

Investigasaun ida ne'ebé halo hosi Divizaun Australianu hosi Antártida (AAD, iha sigla ho lian inglés), ida ne'ebé dahuluk hodi estuda impaktu hosi alterasaun klimátika iha zona sira lahó jelu iha Antártida, kalkula katak sira ne'e sei estende no sei halibur hamutuk.

 

Tuir Aleks Terauds, investigador hosi AAD, kona-ba previzaun, jelu ne'ebé lakon iha 2100 sei hamosu rai besik 17.267 kilómetru kuadradu ne'ebé reprezenta aumentu ida kuaze 25%.

 

"Ne'e sei oferese área foun sira expansaun nian ba espésie nativu sira, maibé bele hamosu mós propagasaun ba espésie invazor sira no, iha prazu naruk, bele halakon espésie nativu sira ne'ebé ladún kompetitivu", hatete hosi Aleks Terauds ne'ebé haktuir iha komunikadu AAD nian.

 

Investigador Jasmine Lee hatete ona katak, la hanesan ho estudu antigu sira ne'ebé sentradu iha diminuisaun hosi kamada jelu nian no iha potensial impaktu iha aumentu nível tasi nian, serbisu foun ne'e fokadu iha efeitu sira iha biodiversidade hosi kontinente jeladu nian.

 

Lee hatete katak zona atual sira lahó jelu konstitui zona importante sira hosi reprodusaun ba foka no manu mariña sira nian, aleinde simu invertebradu sira, fungu sira no alga ne'ebé iha ligasaun ho rejiaun.

 

Investigasaun, publika hosi revista Nature, aprezenta ona ba Komité ba Protesaun Ambiente nian durante reuniaun konsultivu hosi Tratadu Antártida ne'ebé halo iha fulan-Maiu iha Xina.

 

ho Lusa

horadoplaneta às 16:38 | link do post | comentar | Adicionar aos favoritos
Terça-feira, 08.11.16

Mosambike hanesan nasaun ida ne'ebé afetadu liu hosi fenómenu klimátiku iha 2015 - estudu

Mosambike sai hanesan nasaun ida ne'ebé afetadu liu iha tinan 2015 ho fenómenu klimátiku todan sira no kuaze metade hosi Estadu sira ne'ebé hetan estraga situa iha Áfrika, konklui hosi relatóriu ida ne'ebé publika iha loron-tersa ne'e iha Marrakech iha okaziaun hosi konferénsia ONU nian kona-ba klima (COP22)

 

Foto@ António Silva /EPA

 

"Áfrika hanesan fraku tebes hasoru impaktu hosi alterasaun klimátiku sira", subliña hosi Sönke Kreft, autor prinsipal hosi "índice anual hosi risku klimátiku sira nian" ba dala 12 ne'ebé publika hosi organizasaun la'ós governu nian Germanwatch.

 

Iha jeral, nasaun kiak sira hasoru liu tempestade sira, rai-manas maka'as, bee-sa'e ka rai-maran, fenómenu sira ne'ebé nia intensidade no frekuénsia aumenta tanba efeitu hosi akesimentu global.

 

"Divizaun hosi fenómenu klimátiku sira la justu", Kreft hatutan no fó hanoin katak nasaun sira ne'ebé iha dezenvolvimentu tuir istória hanesan de'it responsável hosi parte ida ne'ebé ki'ik tebes hosi emisaun gás sira ho efeitu estufa ne'ebé hanesan orijen hosi fenómenu sira ne'e.

 

Índise hosi Germanwatch rejista akontesimentu todan sira iha nasaun 180, ho baze iha informasaun sira hosi seguradora alemaun MunichRe, no sira seluk.

 

Iha tinan 2015, nasaun ne'ebé afetadu liu hosi fenómenu klimátiku sira maka Mosambike, ho ema na'in 351 mate tanba fenómenu todan sira ne'ebé hamosu ona estraga ho folin dolar millaun 500.

 

Autor sira estudu nian fó hanoin katak iha tinan liubá akontese iha Mosambike inundasaun todan sira ne'ebé mosu tanba udan maka'as ne'ebé hahú iha fulan-Dezembru 2014 no dura ona to'o fulan-Janeiru 2015 nia rohan ka liu. Ema rihun 325 resin maka hetan afeta hosi inundasaun sira ne'e iha Mosambike no ema na'in 163 mate.

 

Bee-sa'e sira hamosu mós konsekuénsia todan sira iha infraestrutura sira no iha agrikultura no hamosu epidemia sira hanesan kólera.

 

Nasaun sira seluk ne'ebé afetadu ho fenómenu klimátiku ne'e iha tinan 2015 maka Dominika, Maláui, Índia, Vanuatu, Birmánia, Bahamas, Gana, Madagáskar ho Xile.

 

Áfrika, kontinente ne'ebé simu COP22, ne'ebé hala'o hela iha Marrakech to'o loron 18 oinmai, hanesan kontinente ne'ebé afetadu tebes, ho nasaun haat maka afetadu entre nasaun 10 (Mosambike, Maláui, Gana ho Madagáskar).

 

Entre nasaun afrikanu sanulu ne'ebé afetadu liu iha 2015 hosi fenómenu klimátiku sira ne'ebé todan iha nasaun haat ho lian portugeza: Mosambike (pozisaun dahuluk), Cabo Verde (pozisaun daualuk), Guiné-Bissau (pozisaun dasia) no Angola (pozisaun 10). Mosambike hanesan mós nasaun afrikanu daruak ne'ebé afetadu liu iha tinan 20 ikus ne'e.

 

Hosi tinan 1996 no 2015, epizódiu todan sira besik 11.000 halo ona ema rihun 528 mate iha mundu, haktuir hosi relatóriu. Tempestade sira, rai-manas no bee-sa'e sira presiza folin dolar biliaun 3.000 iha períudu hanesan.

 

Hosi nasaun sanulu ne'ebé afetadu liu iha dékada rua ikus ne'e, sia hanesan nasaun sira ne'ebé iha dezenvolvimentu iha grupu hosi Estadu sira ho rendimentu ki'ik no médiu-ki'ik.

 

ha tinan 20 nia laran, nasaun sira ne'ebé afetadu liu maka Honduras, Birmánia no Haiti.

 

Filipina, Bangladexe, Pakistaun, Vietnam ho Tailándia afetadu mós iha parte ema nian no mós iha parte osan nian.

 

Germanwatch nia rangking bazeia hosi númeru absolutu hosi ema sira ne'ebé mate no hosi taxa mate ne'ebé asosiadu ho fenómenu klimátiku sira nune'e mós lakon iha nível finanseiru absolutu no lakon tuir unidade PIB nian.

 

Konferénsia Klima ONU nian ba dala 22 halao to'o loron 18 Novembru ho konkretizasaun ba debate hosi Akordu Paris nian ne'ebé hetan iha tinan liubá.

 

ho Lusa

horadoplaneta às 15:13 | link do post | comentar | Adicionar aos favoritos
Segunda-feira, 17.10.16

Alterasaun klimátika bele halo ema millaun 122 resin tama iha pobreza - FAO

Organizasaun ba Alimentasan no Agrikultura alerta iha loron-segunda ne'e katak hanesan urjente área agríkola adapta ba alterasaun klimátiku sira ne'ebé bele halo ema millaun 122 resin tama iha pobreza. 

 

Foto@ António Dasiparu 

 

"Tenki foti medida sira agora hodi hametin agrikultura sai sustentável liu, produtivu no fleksivel hodi nune'e impaktu sira hosi alterasaun klimátiku labele kompromete maka'as produsaun hahán nian iha nasaun no rejiaun sira ne'ebé hasoru ona inseguransa alimentar ne'ebé aas", hakerek hosi diretór-jeral organizasaun nian, José Graziano da Silva, iha prefásiu hosi relatóriu ne'ebé publika iha loron-segunda ne'e.

 

Ho títulu "Estadu hosi Alimentasaun no Agrikultura", relatóriu subliña ona katak, bainhira laiha alterasaun klimátiku, rejiaun barak sei hakarak hamenus ema sira hosi pobreza to'o tinan 2050.

Ho mudansa sira iha klima, no bainhira sei la halo buat ida, kalkula ona katak populasaun moris iha kiak iha ona aumentu ida entre millaun 3 no 122 to'o tinan 2030. Ne'e akontese liuliu tanba impaktu negativu sira hosi akesimentu global iha área agríkola.

 

Sira ne'ebé maka sei afetadu liu maka populasaun sira iha zona kiak sira hosi Áfrika subsarianu, no hosi Súl no Sudeste Aziátiku, liuliu sira ne'ebé maka depende hosi agrikultura hodi moris.

Graziano da Silva defende katak hamlaha, kiak no alterasaun klimátiku sira tenki hala'o hamutuk, maski hanesan "imperativu moral ida, tanba sira ne'ebé maka terus ohin loron hanesan ema sira ne'ebé ladún kontribui ba alterasaun klimátiku sira".

 

Relatóriu hosi FAO fó hanoin katak atu mantén aumentu hosi temperatura global ki'ik liu hosi limiti 2ºC, emisaun sira hosi gás ho efeitu estufa tenki hamenus 70% to'o tinan 2050, ne'ebé sei iha posibilidade ho kontributu hosi área agríkola sira.

 

Pelumenus, área sira ne'e hanesan responsável na 1/5 hosi emisaun sira, liuliu tanba konversaun hosi ai-laran sira iha rai ne'ebé kultivadu, maibé mós tanba pekuária no ba produsaun agríkola nian.

Maibé, tuir hakerek hosi autor sira, área agríkola hasoru dezafiu duplu: hamenus emisaun sira gás nian ho efeitu estufa iha tempu hanesan bainhira produs tan hahán hodi halo bosu populasaun ida ne'ebé aumenta no populasaun ne'ebé aumenta riku.

 

Kalkula katak asaun hodi buka hahán iha 2050 sei aumenta pelumenus 60% duke iha 2006, maibé kresimentu populasaun nian sei konsentra iha rejiaun sira ne'ebé ohin loron iha superioridade ba subnutrisaun no fraku maka'as hasoru alterasaun klimátiku sira.

 

Relatóriu rekoñese katak hadi'a fali agrkultura no sistema alimentar sira sei hanesan prosesu kompleksu ida, tanba númeru boot hosi parte envolvidu sira, ba multiplisidade hosi sistema agríkola no hosi produsaun hahán nian no ba ekosistema sira ne'ebé la hanesan.

 

Nia alerta katak tenki hahú esforsu sira agora tanba impaktu hosi alterasaun klimátiku sira sei sai aat liu ho tempu no bainhira la halo buat ida nasaun kiak sira iha futuru sei hasoru iha tempu hanesan hamlaha, kiak no mudansa klimátiku sira. Iha Graziano da Silva nia liafuan sira, "benefísiu sira adaptasaun nian ultrapasa folin sira hosi falta asaun nian ho marjen ida ne'ebé boot tebes".

 

Iha loron balun antes Konferénsia ba dala 22 hosi Parte sira Konvensaun-Kuadru ONU nian kona-ba Alterasaun Klimátiku, ne'ebé hahú iha 07 Novembru iha Maroko, relatóriu subliña katak susesu hosi mudansa agrikultura depende maka'as hosi tulun ba proprietáriu ki'ik sira iha adaptasaun ba mudansa klimátiku sira.

 

Kalkula katak iha nasaun sira iha dezenvolvimentu família hamutuk millaun 475 resin hosi proprietáriu ki'ik sira ne'ebé prodús iha kontestu sosioekonómiku sira no kondisaun agroekolójiku sira ne'ebé la hanesan, nune'e laiha de'it resposta ida.

Maibé, FAO hakerek iha relatóriu dalan "atlternativu balun no di'ak iha ekonomia" hodi tulun agrikultór sira hodi adapta no halo sira nia moris sai fleksivel, liuliu adopsaun ba hahalok matenek sira,hanesan uza kultura nitrojéniu-efisiente oioin no tolerante ba manas.

 

Adopsaun jeneralizadu hosi prátika nitrojéniu-efisiente, hanesan ezemplu, sei permiti hamenus ema millaun 100 resin hodi labele hetan subnutrisaun, kalkula iha relatóriu.

ho Lusa

horadoplaneta às 22:59 | link do post | comentar | Adicionar aos favoritos
Quinta-feira, 06.10.16

Akordu Paris kona-ba alterasaun klimátika sei vigora iha 04 novembru

ONU konfirma iha horisehik katak  akordu Paris nian kona-ba alterasaun  klimátika sei vigora iha fulan oin mai loron  04 novembru, hafoin alkansa  ona  númeru hosi nasaun sira ne’ebé bele  konkorda  tratadu ne’e.

"Ha’u sente kontente hodi anunsia iha ohin katak  Akordu Paris sei liu etapa daruak no etapa ikus  molok  vigora, ne’ebé sei hahú iha loron 04 novembru", afirma iha komunikadu sekretáriu-jerál Organizasaun Nasoins Unidas (ONU), Ban Ki-moon.

 

Etapa ikus ne’e sei konkretiza hafoin  ratifikasaun akordu hosi Uniaun Europeia (UE) no formalizasaun, iha sede ONU, ba instrumentu legál desizaun ne’e nian, liuhosi  aktu ne’ebé realiza iha ohin.

 

Akordu ne’e presiza, atu vigora, retifikasaun hosi nasaun pelumenu 55  ne’ebé  reprezenta 55% emisaun mundiál ho gas iha efeitu estufa.

 

Hafoirn konfirmasaun, sei  fixa prazu ida  ho loron  30  hodi vigora tratadu, ne’ebé define iha dezembru 2015 iha kapitál franseza hois nasaun  191 no hafoin  tinan barak hala’o negosiasaun.

 

Iha findesemana ne’e  Índia anunsia ratifikasaun Akordu Paris no tersa-feira Nova Zelándia no Konsellu UE.

 

"Impulsu globál ne’ebé estraordináriu tebes atu  Akordu Paris bele vigora iha tinan ida ne’e", afirma Ban Ki-moon, nia hatutan katak "buat ne’ebé molok ne’e  impossível agora imparável".

 

Akordu Paris, ne’ebé konsege iha dezembru reune ona nasaun 196, hakarak reduz emisaun iha  gas ho  efeitu estufa ne’ebé responsável hosi alterasaun klima, ne’ebé bele provoka fenómenu estremu, hanesan rai- manas ka udan maka’as .

 

SAPO TL ho Lusa

horadoplaneta às 08:47 | link do post | comentar | Adicionar aos favoritos
Terça-feira, 17.05.16

Alterasaun Klimátiku: illa lima iha Pasífiku lakon tiha ona

Illa lima ne'ebé uluk pertensa ba arkipélagu hosi Illa sira Salomaun, iha Pasífiku, lakon tiha ona tanba nível médiu tasi nian ne'ebé aumenta, haktuir hosi estudu foun ida ne'ebé publika hosi Environmental Research Letters. 




Illa lima, konstitui de'it hosi vejetasaun, lakon tomak, no illa neen ki'ik sira seluk hetan daudaun prosesu ida "diminuisaun maka'as iha tasi-ibun".

 

Tuir Gizmodo, komunidade piskatóriu rua tenki muda tiha tanba prosesu ne'e. "Komprende fatór lokal sira ne'ebé aumenta sensibilidade hosi illa sira kona-bá erozaun kosteira hanesan krítiku ba ami hodi hetan resposta sira ba adaptasaun hosi komunidade remota sira iha Pacífico", esplika hosi relatóriu.

 

Investigadór sira peskiza imajen sira hosi satelit, ne'ebé hetan entre tinan 1947 no 2014, hodi avalia estadu erozaun hosi illa hamutuk 33, ne'ebé hanesan ba dala uluk maka mudansa natural sira hosi rejiaun hatudu ho pormenor sira.

 

Iha fatin seluk, ekipa hosi sientista australianu sira afirma ona katak Oeste hosi Pasífiku hanesan fatin perfeitu hodi haree aumenta hosi nível tasi nian, tanba populasaun sira muda beibeik ba fatin sira ne'ebé aas.

 

Illa sira Salomaun nian iha populasaun hamutuk 560.000 no iha illa besik 1.000 resin. Populasaun barak maka muda daudaun ba parte foun illa nian ka ba illa sira seluk tanba nível tasi nian ne'ebé aumenta.

 

Taro, kapital hosi provínsia Choiseul, prepara daudaun hodi muda rezidente sira no serbisu sira, no iha vila ida iha parte norte hosi provínsia hanesan senti dalabarak akontesimentu ida tasi-been tama iha ema nia uma sira.

 

Fonte: Green Savers

horadoplaneta às 12:01 | link do post | comentar | Adicionar aos favoritos
Sexta-feira, 04.12.15

Sekretáriu-Jerál ONU enkoraja nasaun sira iha mundu atu iha kompromisu ba akordu ida

Sekretáriu-Jerál  ONU, Ban Ki-moon, apela iha horisehik ba nasaun hotu iha  mundu, riku ka kiak,  hatudu fleksibilidade no kompromisu atu  garante iha Paris akordu di’ak ida kona-bá alterasaun klimátika.


 

"Sei iha servisu barak maka atu halo. Iha kestaun esensiál ne’ebé labele rezolve ho tempu naruk liu ", hatete Ban Ki-moon, iha deklarasaun ba jornalista, antes fila ba  Paris hodi partisipa iha negosiasaun sira.

 

Ban enkoraja nasaun sira  industrializadu  bele  "rekoñese sira nia  responsabilidade  no lideransa" iha prosesu ne’e no nasaun sira ne’ebé sei iha dezenvolvimentu  atu " bele hala’o armonia iha sira nia moris tuir kapasidade ".

 

Maski nune’e,  diplomata sul-koreanu  ne’e  evita atu pronunsia kona-bá  kestaun esensiál ruma  diskusaun nian: karik akordu hasai iha kapitál franseza ne’e juridikamente vigora, ka la’e.

 

 Sekretáriu-Jerál ONU ne’e hatete katak, ba agora, " sei diskute ideia barak" iha nia kontestu no hatutan tan katak importante maka iha paktu firme, universál no iha kondisaun  atu  bele aplika.

 

Ban Ki-moon, ne’ebé  partisipa iha segunda-feira ba  abertura simeira iha paris, dehan sei iha esperansa hosi buat ne’ebé nia rona iha sessaun inaugural ne’e.

 

SAPO TL ho Lusa.

horadoplaneta às 03:30 | link do post | comentar | Adicionar aos favoritos
Terça-feira, 10.11.15

El Niño nia kbiit nebe aumenta ameasa labarik sira nia moris, avizu hosi UNICEF

Iha loron-tersa ne'e UNICEF hatete katak labarik millaun 11 iha risku hetan hamlaha, moras no falta bee iha Áfrika Orientál ho Austral tanba forsa nebe aumenta hosi fenómenu meteorolójiku nebe koñesidu ho naran El Niño.

 



Tuir UNICEF/Fundu hosi Nasaun Unidu ba Infánsia, El Niño halo mós rai-maran no bee-sa'e iha parte balun hosi Ázia, hosi rejiaun Pasífiku no hosi Amérika Latinu.

El Niño hanesan padraun klimátiku ida ligadu ba akesimentu hosi bee sira iha superfísie Oseanu Pasífiku nian nebe bele iha efeitu maka'as iha padraun klimátiku sira iha mundu tomak.

Manifestasaun sira hosi El Niño sei akontese ho períudu ida nebe la hanesan entre tinan rua no tinan hitu nia laran.

"Konsekuénsia sira bele iha efeitu hosi kaskata kona-bá jerasaun oioin, nune'e komunidade afetadu sira simu apoiu hodi hasoru ho diminuisaun ba kolleita sira no falta asesu ba bee moos nebe halo daudaun labarik sira laiha nutrisaun nebe di'ak no iha risku hasoru moras todan sira", alerta hosi UNICEF.

Tuir UNICEF, El Niño bele hamosu aumentu maka'as tebes ba moras sira hanesan malária, dengue, diareia ho kólera - moras sira nebe sai hanesan kauza prinsipál ba labarik sira nia mate.

"Bainhira kondisaun meteorolójiku extremu sira muda komunidade sira nia dalan moris, labarik ki'ik sira hetan liu terus tanba subnutrisaun, nebe halo sira sai liu fraku hodi hetan moras, sofre ba atrazu iha dezenvolvimentu kognitivu no mate prematuru", hatutan UNICEF.

 



"Labarik sira no komunidade sira nebe hetan problema ne'e presiza ita nia tulun hodi rekupera hosi impaktu El Niño nian no hodi bele prepara ba estraga sira nebe bele mosu hosi fenómenu ne'e", hatete hosi diretór ezekutivu UNICEF nian, Anthony Lake.

Nia hatete katak intensidade no potensiál hosi destruisaun El Niño nian bele hatudu alerta ida ba reuniaun hosi líder mundiál sira nian iha Paris.

"Bainhira hahú diskusaun ba akordu ida hosi limita akesimentu globál, tenki hanoin katak labarik sira nia futuru iha loron ohin no planeta nia futuru nebe sira sei hetan maka sai hanesan kauza", hatete hosi Anthony Lake.

Líder mundiál sira sei hasoru malu iha Paris iha Konferénsia Nasaun Unidu nian ba dala 21 kona-bá Klima, nebe koñesidu mós hanesan COP21, hosi loron 30 Novembru to'o 11 Dezembru tuirmai.

Objetivu hosi enkontru ne'e maka hetan akordu vinkulativu ida nebe hakarak limita akesimentu globál iha diminuisaun ba emisaun gás sira nebe iha efeitu estufa nian.

Akontesimentu sira hosi El Niño la'ós mosu hosi alterasaun klimátiku, maibé sientista sira fiar katak agora aumenta liu iha rezultadu sira hosi alterasaun klimátiku nian.

Nasaun barak nebe agora daudaun terus tanba efeitu sira hosi El Niño maka sira nebe hasoru ameasa todan hosi parte alterasaun klimátiku nian. Área sira nebe afetadu iha mós nível kiak nebe aas tebes.

Tuir espesialista sira, karik provável atu fenómenu meteorolójiku ne'e, hanesan ida nebe maka'as liu, sei hamosu tan bee-sa'e no rai-maran, hamosu tufaun no siklone sira iha Pasífiku, no afeta zona barak bainhira hetan nafatin kbiit hanesan hatudu iha previzaun sira ba fulan hirak tuirmai ne'e.

Somália, Etiópia, Indonézia, nasaun sira iha Pasífiku, Guatemala, Honduras, El Salvador, Peru, Ekuadór hanesan nasaun no rejiaun balun nebe afetadu hosi fenómenu El Niño.

ho Lusa

horadoplaneta às 14:39 | link do post | comentar | Adicionar aos favoritos
Segunda-feira, 09.11.15

Tinan ne'e akontese ona inséndiu 127.000 iha Indonézia

Iha fulan-Outubru nia rohan, prezidente indonéziu, Joko Widodo, antesipa nia regresu hosi vizita ida iha Estadus Unidus tanba kuantidade aas hosi inséndiu nebe akontese iha nasaun ne'e.

 

 

Inséndiu akontese beibeik iha nasaun aziátiku ne'e, maibé tinan ne'e, karik tanba kondisaun rai-maran nebe provoka hosi El Niño maka'as tebes, Indonézia liuhosi tinan nebe aat liu relasionadu ho ahi-han ai-laran sira, nebe hanesan problema kompleksu ida ba saúde populasaun sira nian, tanba fumu tóxiku, no mós ba kondisaun klimátiku nebe hetan estraga iha futuru.

Tuir Climate Central, tinan ne'e akontese ona inséndiu 127.000 iha Indonézia, barak liu ho intensidade nebe maka'as. "Époka ahi-han nian iha tinan ne'e maka'as tebes, rivaliza ho tinan 1997. No kondisaun sira hatudu katak sei iha nafatin inséndiu", esplika hosi sientista klimátiku ndrew Robertson, hosi International Research Institute for Climate and Society (IRI).

Robertson ho responsável sira seluk hosi IRI dezenvolve ona dalan lima ba previzaun inséndiu sira nian ba Governu indonéziu, hodi identifika surtu no planeia estasaun sira ahi nian ho tempu. Robertson esplika katak bainhira inséndiu ida dura sei susar tebes atu domina inséndiu ne'e.

Loron-loron, Indonézia liberta gás sira nebe iha efeitu estufa ba atmosfera, tanba ahi-han ai-laran sira, duké ekonomia tomak norte-amerikanu nian. Emisaun sira hosi gás ho efeitu estufa hosi inséndiu indonéziu nian liu tiha ona emisaun sira nebe tinan-tinan liberta hosi Japaun no hatudu ona 3% hosi totál emisaun gás sira ho efeitu estufa hosi atividade sira ema tomak iha mundu nian.

Ne'e signifika katak ahi sira kontribui ba alterasaun klimátiku iha tempu naruk maibé mós aumenta problema sira saúde nian iha rejiaun - haktuir hosi Guardian, diagnóstika ona ema na'in 500.000 resin ho moras nebe iha ligasaun ho inséndiu ka mosu tanba inséndiu. La'ós de'it iha Indonézia maibé mós iha Singapura ho Malázia.

Fonte: Green Savers

horadoplaneta às 15:21 | link do post | comentar | Adicionar aos favoritos
Segunda-feira, 02.11.15

Prezidente fransés hatete katak apoiu hosi Xina "hanesan importante" ba akordu ida iha konferénsia Paris

Prezidente fransés, Francois Hollande, hatete ohin katak apoiu xinés "hanesan importante" ba akordu efetivu ida iha diálogu sira klimátiku nian hosi Nasaun Unidu (COP21), nebe sei hala'o iha fulan ne'e nia rohan, iha Paris.


EPA@ Thibault Camus

 

Iha vizita ida Estadu ida ba Xina durante loron rua, Hollande afirma ona katak hakarak "akordu globál no ambisiozu ida, nebe limiti akesimentu globál ba másimu sentígradu rua".

 

"Apoiu xinés hanesan importante", hatete Holland, iha munisípiu Chongqing, iha sentru nasaun nian, hodi hatutan katak "luta hasoru akesimentu globál hanesan kestaun humanitáriu ida - oinsá haree planeta rezervadu - no asuntu ida nebe konsidera ba importánsia ekonómiku, hodi hanesan kresimentu "matak".

 

Xina, emisór boot liu hosi gás sira nebe halo poluisaun iha mundu, sai hanesan elementu xave iha negosiasaun sira nebe hahú iha loron 30 fulan-Novembru, iha tempu ida nebe nasaun dezenvolvidu sira ko'alia kona-bá parte sira nebe tenki kaer responsabilidade maka'as hodi hamenus emisaun sira.

 

Diálogu sira sei konserta iha mekanizmu ida nebe sei akompaña kompromisu sira hosi nasaun envolvidu hamutuk 195: Fransa defende dalan jurídiku ida, nebe sei halo revizaun tinan lima dala ida, bainhira Xina lakohi dalan ruma hosi sistema punitivu nian.

 

Pekin, nebe halo susar ona negosiasaun sira durante konferénsia hosi Kopenhaga iha 2009, promete ona katak nia emisaun sira karbonu nian sei to'o másimu "hahú hosi tinan 2030".

 

Ne'e hanesan vizita daruak hosi xefe Estadu europeu ida ba Xina iha semana ida nia laran, hafoin xanxeler alemaun, Angela Merkel, hakotu tiha vizita iha loron-sesta liubá, vizita ida nebe dura loron haat.

 

Iha fulan liubá, Xina ho Reinu Unidu hetan ona akordu ho folin libra millaun rihun 40 durante vizita Estadu dahuluk hosi Prezidente xinés nian, Xi Jinping, iha Londres.

 

Loron daruak no ikus vizita nian sei dedika ba koperasaun entre empreza sira hosi nasaun rua ne'e, ho fórum ida inauguradu hosi primeiru-ministru xinés, Li Keqiang.

 

Xina hanesan nasaun daruak boot hosi parseiru komersiál Fransa nian. Iha média, tranzasaun komersiál loron-loron sira entre nasaun rua ne'e to'o euro millaun 160. Fransa hanesan destinu datoluk hosi investimentu xinés nian iha Europa, tuir Reinu Unidu no Alemaña. Portugal fahe fatin dahaat ho Itália.

 

"Kompara ho resepsaun hosi líder sira Alemaña ho Fransa nian ba Dalai Lama, maski hosi protestu xinés sira, iha 2007 no 2008, buat sira muda maka'as, tanba Xina agora iha inisiativu iha relasaun sino-europeiu sira", hakerek hosi jornál ida Partidu Komunista Xinés nian (PCC) iha semana liubá.

 

Iha editoriál, Global Times, jornál ho lian inglés hosi grupu Diáriu Povu nian, órgaun sentrál hosi PCC, defende katak "Xina tenki buka interasaun ida benéfiku liu ho Europa", argumenta katak lasu sira ho kontinente europeu bele "kontrabalansa ho bandu sira nebe fó hosi aliansa EUA-Japaun".

 

ho Lusa

horadoplaneta às 12:12 | link do post | comentar | Adicionar aos favoritos
Segunda-feira, 14.09.15

Iha ai-hun hamutuk triliaun tolu iha mundu

Estudu ida hosi Universidade Yale ho baze iha informasaun topográfiku sira no imajen sira hosi satelit permiti ona kalkula kuantidade hosi ai-laran sira iha Mundu, ho rezultadu di'ak tebes duké rezultadu uluk sira.


 

Estudu ida hosi Universidade Yale, nebe publika iha revista sientífiku "Nature", kalkula katak iha ai-hun hamutuk triliaun tolu iha mundu, ka hamutuk ai-hun 420 iha habitante ida-idak iha planeta ne'e. Númeru ne'e hanesan aas liu duké númeru nebe kalkula antes nebe hatudu millaun rihun 400.

 

Ekipa hosi Thomas Crowther hetan ona informasaun sira ne'e bainhira uza informasaun topográfiku hosi kontinente haat, eseptu Austrália, kombina ho análize hosi foto sira satelite nian. Rezultadu sira ne'e depois aplika ba teritóriu nebe laiha informasaun disponível. Hanesan ezemplu, informasaun sira hosi ai-laran iha Kanadá no iha norte Europa nian serve hodi halo estimativu ida relasionadu ho ai-laran sira iha zona remotu hosi Rúsia.

 

«Ami la deskobre ai-hun foun sira», esplika hosi sientista. «Buat nebe ami halo maka hatama informasaun sira nebe permiti mai ami hodi halo fali estimativu anteriór sira».

 

Kálkulu nebe ho konfiansa liu sei serve hanesan baze ba peskiza no estudu sira kona-bá biodiversidade, nune'e mós ba modelu sira mudansa klimátiku nian, tanba ai-hun sira iha knaar importante hodi halakon dióxido karbonu nian iha atmosfera.

 

Konkluzaun importante seluk nebe hetan hosi estudu ne'e maka knaar hosi atividade ema nian iha desflorestasaun. Ai-hun millaun rihun 15 resin maka ema ko'a tinan-tinan, haktuir hosi peskiza. «Impaktu hosi ema hanesan maka'as tebes», hatete hosi Thomas Crowther. «Loos duni katak ita hein atu ema sira iha knaar importante ida maibé ha'u hanoin katak ne'e sai hanesan fatór importante liu iha kontrolu ba densidade ai-hun sira nian».

 

Densidade ai-hun sira lokaliza iha ai-laran sira iha Amérika-Norte, Eskandinávia ho Rúsia. Ai-laran sira ne'e, barak liu iha ai-hun konífera sira, iha ai-hun hamutuk millaun rihun 750, ho totál hamutuk 24%. Ai-laran tropikál sira no subtropikál sira iha ai-hun hamutuk triliaun 1,3, ho totál 43%.

 

"Maski númeru hosi ai-hun sira aas tebes duké númeru nebe ita hanoin, sientista sira lansa alerta: «Ami lakohi hatete katak buat hotu di'ak hela». Tanba, rezultadu sira hatudu katak iha fatin balun iha mundu, nebe hein katak iha ai-hun barak liu, hahalok hosi ema nian hanesan agrkultura la permiti ba ai-hun sira hodi moris.

 

ho Mood

horadoplaneta às 14:22 | link do post | comentar | Adicionar aos favoritos

pesquisar

 

Agosto 2017

D
S
T
Q
Q
S
S
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
30

posts recentes

arquivos

tags

subscrever feeds

blogs SAPO