Segunda-feira, 30.10.17

ONU: Dióksidu karbonu iha atmosfera to'o nível rekord iha 2016

Konsentrasaun hosi dióksidu karbonu (CO2) iha atmosfera responsável ba alterasaun klimátiku sira to'o ona nível rekord ida iha tinan 2016, fó sai hosi Organizasaun Mundial Meteorolojia, ne'ebé alerta ba possibilidade "aumentu perigozu hosi temperatura". 

 

 

"Ba dala ikus ne'ebé maka Rai rejista ona proporsaun ida hosi dióksidu karbonu hanesan maka iha tinan millaun tolu to'o millaun lima liubá: temperatura iha tempu ne'ebá maka 2º to'o 3º C [Celsius] aas liu no nível tasi nian iha tempu ne'ebá aas liu iha metru 10 no metru 20 relativu ho tempu atuál", refere hosi ajénsia ONU nian iha nia boletim anual kona-ba gás sira ho efeitu estufa nian.

 

ho Lusa

horadoplaneta às 11:13 | link do post | comentar | Adicionar aos favoritos
Quarta-feira, 14.06.17

Hatudu domin ba oseanu sira

Filmi furak ida hatudu mai ita buat hotu ne'ebé maka oseanu fó mai ita. No halo ita hanoin "no ita, saida maka ita fó?" 

 

 

Ho de'it minutu ida, minutu simples ida hodi sensibiliza humanidade ba importánsia hosi oseanu sira no nesesidade hodi prezerva. ho de'it minutu ida no filmi ida ne'ebé halo di'ak tebes, ho atór mexikanu Diego Luna, ne'ebé ikus ne'e sai hanesan defensór ba kauza ne'e. Iha semana ne'e atór ativista marka ona prezensa iha Semana Oseanu sira ONU nian.

 

Ho títulu “What The Ocean Gives Us”, vídeo ne'e grava hamutuk ho marka serveja mexikanu nian Corona no Parley, ONG ida ne'ebé promove di'ak defeza ba oseanu sira no hakarak bolu mós atensaun ba projetu hamutuk ida hodi proteje illa hamutuk 100 hosi ameasa sira plástiku nian iha oseanu sira. Projetu ida ne'ebé sei halo to'o tinan 2020.

 

Fonte: Green Savers

horadoplaneta às 16:11 | link do post | comentar | Adicionar aos favoritos

Juncker: Uniaun Europeia sei la negosia fali Akordu Paris nian kona-ba klima

Prezidente Komisaun Europeia nian hatete iha loron-kuarta ne'e, iha Parlamentu Europeu, iha Estrasburgu, katak "Uniaun Europeia sei la negosia fali Akordu Paris nian" kona-ba klima, maski iha abandonu hosi Estadus Unidus, ne'ebé nia klasifika hanesan deziluzaun ida. 

 

 

"Artigu hamutuk 29 hosi akordu tenki implementa no hanesan la'ós halo fali negosiasaun. Asaun klimátiku la presiza tan distrasaun sira. Ita liuona tinan 20 nia laran halo negosiasaun, agora hanesan tempu asaun nian, hanesan tempu hodi implementa", deklara hosi Jean-Claude Juncker, ne'ebé hetan aklamasaun hosi eurodeputadu sira.

 

Juncker hatete ona katak UE hanesan "dezapontadu" no "lamenta desizaun" hosi administrasaun norte-amerikanu ne'ebé lidera hosi Donald Trump hodi "sai hosi asaun komun" iha kombate hasoru akesimentu global, maibé nia subliña ona katak ne'e "la signifika final hosi Akordu Paris nian".

 

Nia hatudu mós konviksaun katak saída hosi EUA nian "sei halo nasaun sira seluk iha mundu sai unidu liu no determinadu hodi serbisu ba implementasaun tomak" hosi "akordu istóriku" ne'ebé asina iha kapital franseza iha tinan 2015.

 

ho Lusa

horadoplaneta às 12:40 | link do post | comentar | Adicionar aos favoritos
Terça-feira, 22.11.16

Rekord sira ba temperatura aas sei akontese beibeik duké temperatura malirin

Estudu ida ne'ebé divulga, iha loron-segunda ne'e, kalkula katak rekord diáriu hosi temperatura aas sira iha EUA sei mosu beibeik duké temperatura sira malirin nian. 

 

AFP Photo@ Jim Watson

 

Baibain, nasaun ne'e hetan númeru máxima hanesan hosi temperatura manas no malirin nian iha tinan ida nia laran. Maibé hahú tinan 2010 maka ne'e la akontese ona, ho rekord hosi loron manas sira aumenta maka'as duké temperatura malirin sira.

 

Estudu, ne'ebé publikadu iha Anais hosi Akademia norte-amerikanu sira Siénsia nian, kalkula katak bainhira alterasaun klimátiku sira aumenta, númeru ne'e sa'e ba rekord 15 manas nian tuir ida hosi malirin nian.

 

Autór prinsipal hosi estudu, Gerald Meehlm, hosi Sentru norte-amerikanu hosi Investigasaun Atmosfériku, kalkula katak númeru ne'ebé laiha ekilíbriu maka'as bele akontese iha tinan 50 nia laran hahú agora, bainhira emisaun hosi gás ho efeitu estufa ne'ebé mosu bainhira sunu karvaun, petróleu no gás, kontinua ho ritmu ida hanesan ho agora.

 

ho Lusa

horadoplaneta às 13:54 | link do post | comentar | Adicionar aos favoritos
Quarta-feira, 16.11.16

Pekin iha alerta laranja tanba poluisaun

Autoridade sira Pekin nian sei ativa iha loron-kinta kalan iha kapital xineza alerta laranja tanba poluisaun, tanba abu-abun metin ne'ebé karik sei taka sidade to'o loron-domingu, informa ona ajénsia ofisial Xinhua. 

 

Foto@ Wu Hong / EPA

 

Alerta laranja, ne'ebé hanesan alerta ida aas liu ba dala rua hosi eskala alerta haat, sei ativa ofisial iha kalan boot.

 

Konsentrasaun hosi partíkula sira PM 2,5, ida ne'ebé mihis tebes no sensível tebes atu bele tama iha pulmaun sira, to'o loron-kuarta tuku 12:00 fiksa iha mikrograma 165 tuir metru kúbiku.

 

Maski aas liu duké mikrograma 25 máximu ne'ebé rekomenda hosi Organizasaun Mundial Saúde nian, hanesan ki'ik bainhira kompara ho númeru ne'ebé rejistadu iha fulan-Novembru 2015, bainhira iha loron tolu nia laran númeru ne'e fiksa iha mikrograma 450 no 666.

 

Maski ho konsentrasaun iha nível aas tebes, autoridade sira halo de'it alerta laranja ida.

 

Iha de'it loron 07 no 10 Dezembru tinan liubá maka kapital xineza dekreta ona alerta mean ba dala uluk, dezde hahú sistema kór siraa nian iha tinan 2013 hafoin hetan krítika sira tanba la foti antes desizaun ne'e.

 

Alerta laranja implika bandu ruma iha tránzitu (karreta sira bele la'o de'it iha loron sira alternadu, tuir númeru matríkula nian), bainhira populasaun hetan rekomendasaun hodi labele sai hosi uma, liuliu ba labarik sira no katuas-ferik sira.

 

Fábrika sira no estaleiru sira ne'ebé halo liu poluisaun hamenus ka hapara produsaun, bainhira atividade eskola sira nian iha ár livre sei kansela.

 

Tuir normativu, alerta laranja fó sai nafatin bainhira nível sira konsentrasaun nian ultrapasa mikrograma 200. Alerta mean mosu bainhira kalkula katak poluisaun fiksa iha nível aas liu durante pelumenus loron tolu konsekutivu.

 

Alerta sira tenki fó sai pelumenus oras 25 antes poluisaun hetan númeru aas tebes.

 

ho Lusa

horadoplaneta às 11:08 | link do post | comentar | Adicionar aos favoritos
Segunda-feira, 14.11.16

Tinan-tinan dezastre natural sira halo ema millaun 26 sai kiak - BM

Dezastre natural sira halo ema millaun 26 sai kiak tinan-tinan no halo lakon tinan-tinan dolar biliaun 520 iha konsumu, fó sai hosi relatóriu ne'ebé publika iha loron-segunda ne'e hosi Banku Mundial. 

 

Ambiente hafoin pasajen hosi furakaun Matthew iha Baracia, Cuba,  iha loron 07 Outubru 2016. Foto@ Alejandro Ernesto /EPA

 

Ho títulu "'Unbreakable: Building the Resilience of the Poor in the Face of Natural Disasters", relatóriu hosi Banku Mundial no hosi Instituisaun Global hodi Hamenus Dezastre sira no Rekuperasaun (GFDRR) aviza katak impaktu humanu no ekonómiku hosi fenómenu klimátiku todan sira hanesan aat liu duké kalkula.

 

"Xoke klimátiku todan sira ameasa muda dékada sira progresu nian hasoru kiak", hatete hosi prezidente hosi Grupu Banku Mundial nian, Jim Yong Kim, ne'ebé haktuir iha komunikadu instituisaun nian.

 

"Tempestade sira, inundasaun sira no rai-maran iha konsekuénsia maka'as ema nian no ekonómiku, ho ema kiak sira dalabarak selu folin ne'ebé aas tebes. Harii kapasidade hodi ultrapasa dezastre sira halo sentidu iha ekonomia no mós hanesan obrigasaun moral", nia hatutan.

 

Fó sai durante konferénsia Klima ONU nian (COP22), ne'ebé hala'o iha Marrakech, relatóriu analiza efeitu sira hosi fenómenu klimátiku maka'as sira iha medida rua: ida maka estraga patrimonial sira no estraga sira iha moris di'ak, ne'ebé permiti avalia ho di'ak estraga sira ba ema kiak sira, tanba "lakon dolar ida laiha signifikadu hanesan ba ema riku ida duké ba ema kiak ida".

 

Iha nasaun 117 ne'ebé maka hala'o estudu, autor sira hakerek, efeitu maka'as klimátiku sira nian iha moris di'ak, sukat iha estraga sira iha konsumu, hanesan boot liu duké estraga patrimonial sira nian.

 

Tanba efeitu sira hosi dezastre natural sira afeta maka'as ema kiak sira, ne'ebé iha kapasidade limitadu hodi bele hasoru ho efeitu sira, relatóriu kalkula katak impaktu iha moris di'ak hosi nasaun sira ne'e sei hanesan ho estraga sira iha konsumu ho folin dolar biliaun 520. Kálkulu ne'e ultrapasa previzaun sira ne'ebé halo antes to'o 60%.

 

Investigador sira fó ezemplu katak, karik bele evita dezastre natural sira hotu iha nasaun ualu ne'ebé hetan estudu, númeru hosi ema sira ne'ebé iha kiak maka'as - ne'ebé moris la to'o dolar ida loron ida - sei tuun ba millaun 26.

 

Fó sai durante konferénsia klima ONU nian (COP22), ne'ebé hala'o iha Marrakech to'o loron 18, relatóriu subliña urjénsia hodi foti polítika matenek sira sira kona-ba klimátiku sira, hodi protege di'ak ema sira ne'ebé fraku liu.

 

Ema kiak sira hanesan hasoru liu dezastre natural sira, lakon tan sira nia rikusoin, no dalabarak laiha apoiu sira hosi família, hosi sistema finanseiru ka hosi governu sira.

 

Relatóriu hosi Banku Mundial uza métodu foun hodi sukar estraga sira ne'ebé halo hosi dezastre sira, kontabiliza todan ne'ebé la hanesan hosi dezastre natural sira iha ema kiak sira.

 

Autor sira fó ezemplu katak siklone Nargis, ne'ebé afeta ona Myanmar iha tinan 2008, halo agrkultor barak hosi nasaun ne'e tenki fa'an sira nia propriedade, inklui rai, hodi halo kmaan todan hosi tusan sira ne'ebé sira hetan tanba dezastre. Impaktu ekonómiku no sosial sira hosi siklone Nargis sei senti hosi jerasaun sira, alerta hosi sientista sira.

 

Relatóriu avalia, ba dala uluk, benefísiu sira hosi intervensaun sira ne'ebé permiti aumenta kapasidade hodi hasoru dezastre iha nasaun sira ne'ebé estudadu, inklui sistema sira alerta nian, asesu hodi hadi'a banka pesial, polítika sira seguru nian no sistema sira protesaun sosial ne'ebé permiti tulun ema sira hodi hatán no rekupera di'ak hosi xoke sira.

 

Medida sira ne'e sei tulun nasaun sira no komunidade sira hodi poupa dolar biliaun 100 tinan-tinan no hamenus impaktu sira hosi dezastre sira iha moris di'ak ba 20%.

 

"Nasaun sira hasoru aumentu hosi númeru sira xoke nian ne'ebé derepente hanesan rezultadu hosi alterasaun klimátiku sira", hatete hosi Stephane Hallegatte, ekonomista hosi GFDRR, hodi hatutan katak "ema kiak sira presiza protesaun sosial no finanseiru hasoru dezastre sira ne'ebé labele evita".

 

"Ho polítika sira ne'ebé ita hatene katak sei hanesan efikaz, ita iha oportunidade hodi evita atu ema millaun resin sai kiak", nia hakotu.

 

ho Lusa

horadoplaneta às 13:42 | link do post | comentar | Adicionar aos favoritos
Terça-feira, 08.11.16

Mosambike hanesan nasaun ida ne'ebé afetadu liu hosi fenómenu klimátiku iha 2015 - estudu

Mosambike sai hanesan nasaun ida ne'ebé afetadu liu iha tinan 2015 ho fenómenu klimátiku todan sira no kuaze metade hosi Estadu sira ne'ebé hetan estraga situa iha Áfrika, konklui hosi relatóriu ida ne'ebé publika iha loron-tersa ne'e iha Marrakech iha okaziaun hosi konferénsia ONU nian kona-ba klima (COP22)

 

Foto@ António Silva /EPA

 

"Áfrika hanesan fraku tebes hasoru impaktu hosi alterasaun klimátiku sira", subliña hosi Sönke Kreft, autor prinsipal hosi "índice anual hosi risku klimátiku sira nian" ba dala 12 ne'ebé publika hosi organizasaun la'ós governu nian Germanwatch.

 

Iha jeral, nasaun kiak sira hasoru liu tempestade sira, rai-manas maka'as, bee-sa'e ka rai-maran, fenómenu sira ne'ebé nia intensidade no frekuénsia aumenta tanba efeitu hosi akesimentu global.

 

"Divizaun hosi fenómenu klimátiku sira la justu", Kreft hatutan no fó hanoin katak nasaun sira ne'ebé iha dezenvolvimentu tuir istória hanesan de'it responsável hosi parte ida ne'ebé ki'ik tebes hosi emisaun gás sira ho efeitu estufa ne'ebé hanesan orijen hosi fenómenu sira ne'e.

 

Índise hosi Germanwatch rejista akontesimentu todan sira iha nasaun 180, ho baze iha informasaun sira hosi seguradora alemaun MunichRe, no sira seluk.

 

Iha tinan 2015, nasaun ne'ebé afetadu liu hosi fenómenu klimátiku sira maka Mosambike, ho ema na'in 351 mate tanba fenómenu todan sira ne'ebé hamosu ona estraga ho folin dolar millaun 500.

 

Autor sira estudu nian fó hanoin katak iha tinan liubá akontese iha Mosambike inundasaun todan sira ne'ebé mosu tanba udan maka'as ne'ebé hahú iha fulan-Dezembru 2014 no dura ona to'o fulan-Janeiru 2015 nia rohan ka liu. Ema rihun 325 resin maka hetan afeta hosi inundasaun sira ne'e iha Mosambike no ema na'in 163 mate.

 

Bee-sa'e sira hamosu mós konsekuénsia todan sira iha infraestrutura sira no iha agrikultura no hamosu epidemia sira hanesan kólera.

 

Nasaun sira seluk ne'ebé afetadu ho fenómenu klimátiku ne'e iha tinan 2015 maka Dominika, Maláui, Índia, Vanuatu, Birmánia, Bahamas, Gana, Madagáskar ho Xile.

 

Áfrika, kontinente ne'ebé simu COP22, ne'ebé hala'o hela iha Marrakech to'o loron 18 oinmai, hanesan kontinente ne'ebé afetadu tebes, ho nasaun haat maka afetadu entre nasaun 10 (Mosambike, Maláui, Gana ho Madagáskar).

 

Entre nasaun afrikanu sanulu ne'ebé afetadu liu iha 2015 hosi fenómenu klimátiku sira ne'ebé todan iha nasaun haat ho lian portugeza: Mosambike (pozisaun dahuluk), Cabo Verde (pozisaun daualuk), Guiné-Bissau (pozisaun dasia) no Angola (pozisaun 10). Mosambike hanesan mós nasaun afrikanu daruak ne'ebé afetadu liu iha tinan 20 ikus ne'e.

 

Hosi tinan 1996 no 2015, epizódiu todan sira besik 11.000 halo ona ema rihun 528 mate iha mundu, haktuir hosi relatóriu. Tempestade sira, rai-manas no bee-sa'e sira presiza folin dolar biliaun 3.000 iha períudu hanesan.

 

Hosi nasaun sanulu ne'ebé afetadu liu iha dékada rua ikus ne'e, sia hanesan nasaun sira ne'ebé iha dezenvolvimentu iha grupu hosi Estadu sira ho rendimentu ki'ik no médiu-ki'ik.

 

ha tinan 20 nia laran, nasaun sira ne'ebé afetadu liu maka Honduras, Birmánia no Haiti.

 

Filipina, Bangladexe, Pakistaun, Vietnam ho Tailándia afetadu mós iha parte ema nian no mós iha parte osan nian.

 

Germanwatch nia rangking bazeia hosi númeru absolutu hosi ema sira ne'ebé mate no hosi taxa mate ne'ebé asosiadu ho fenómenu klimátiku sira nune'e mós lakon iha nível finanseiru absolutu no lakon tuir unidade PIB nian.

 

Konferénsia Klima ONU nian ba dala 22 halao to'o loron 18 Novembru ho konkretizasaun ba debate hosi Akordu Paris nian ne'ebé hetan iha tinan liubá.

 

ho Lusa

horadoplaneta às 15:13 | link do post | comentar | Adicionar aos favoritos
Segunda-feira, 07.11.16

Konferénsia ONU nian hahú ona hodi "avansa ba asaun klimátiku"

Konferénsia ONU nian ba dala 22 kona-ba alterasaun klimátiku (COP22) hahú ona, halibur ema rihun 20 resin, iha Maroko, hodi konkretiza kompromisu sira ne'ebé asumi ona iha Akordu Paris nian, hasoru akesimentu global. 

 

Bandeira sira hosi nasaun sira ne'ebé partisipa iha Konferénsia ONU nian (COP22) iha Marrakesh, Maroko. Foto@ Mohamed Messara / EPA


"Marrakesh hanesan momentu ida hodi avansa ba asaun klimátiku", hatete hosi responsável ba Klima iha ONU, Patricia Espinosa, bainhira loke konferénsia, hodi apela ba nasaun sira hodi foti lalais medida sira.

 

Konferénsia ba dala 22 hanesan oportunidade ida "hodi inventa mundu futuru ida no konsege justisa klimátiku ida2, deklara ona hosi Ségolène Royal, ministra Ambiente Fransa nian no prezidente hosi simeira ne'ebé apoia Akordu Paris nian, iha tinan liubá, ne'ebé asina hosi Estadu hamutuk 192 no ratifika tiha ona hosi nasaun atus resin.

 

"Ha'u halo apelu ida ba nasaun sira ne'ebé seidauk ratifika [Akordu Paris nian] hodi halo ratifikasaun to'o tinan ne'e nia rohan", nia insisti.

 

Xefe diplomasia marokinu nian, Salaheddine Mezouar, ne'ebé prezidi COP22, apela ona ba mundu hodi "mantén espíritu" Paris nian, ne'ebé signifika ona "mobilizasaun ida ne'ebé nunka akontese", ne'ebé hatudu iha akordu ne'ebé adopta iha tinan 2015 nia rohan.

 

"Buat ne'ebé maka tenki trata la'ós de'it alterasaun klimátiku maibé kestaun ida sivilizasaun nian no dezenvolvimentu ekonómiku", nia hatutan hodi apela ba nasaun sira atu "iha liu ambisaun".

 

Ministru marokinu subliña mós "responsabilidade koletivu" hodi hatán ba nesesidade sira hosi nasaun sira ne'ebé fraku, hodi konfirma deklarasaun sira hosi ministra franseza, ne'ebé fó hanoin katak "Áfrika hanesan kontinente ida ne'ebé terus liu ho alterasaun klimátiku sira ne'ebé mosu la'ós hosi sira nia responsabilidade".

 

Negosiadór sira iha asuntu oioin hodi konkorda, hodi hala'o paktu ne'e, liuliu ba definisaun hosi regra sira transparénsia nian, aprezentasaun hosi estratéjia nasional sira to'o tinan 2050 no tulun finanseiru ba nasaun sira ne'ebé iha dezenvolvimentu.

 

Regra sira transparénsia nian iha relasaun ho informasaun sira ne'ebé nasaun sira tenki fó kona-ba esforsu sira hodi fó limiti ba sira nia emisaun no progresu sira iha tulun finanseiru públiku sira.

 

Hamutuk ho transparénsia maka'as, akordu hakarak haree ba reforsu ida hosi planu asaun nian hosi nasaun ida-idak, hodi limita akesimentu global ba +2°C aas liu hosi nível pré-industria sira nian.

 

Aleinde objetivu sira hodi limita akesimentu ba +2ºC, Akordu Paris nian hakarak atu nasaun sira hala'o "esforsu tomak ne'ebé presiza" hodi labele ultrapasa 1,5 grau Celsius, evita nune'e "impaktu sira ne'ebé aat liu hosi alterasaun klimátiku sira nian".

 

Maibé, kompromisu atual sira halo planeta iha trajetóriu ida liu +3°C, ka to'o duni 3,4°C, haktuir hosi relatóriu ida ONU nian ne'ebé fó sai foin lalais ne'e.

 

Hodi bele mantén akesimentu ki'ik liu hosi +2ºC, emisaun sira gás ho efeitu estufa tenki para aumenta no hafoin ne'e tenki hamenus entre 40 no 70 %, entre tinan 2010 no 2050, haktuir hosi espesialista sira.

 

Antes, paralizasaun hodi hamenus emisaun gás sira ho efeitu estufa implika opsaun klean ida hosi enerjia verde sira no husik kombustivel fossil sira (petróleu, karvaun no gás).

 

Presiza investimentu sira barak hodi halo área habitasaun sira, transporte sira no indústria sira ladún depende ba enerjia, nune'e mós hanesan ho polítika foun sira agríkola nian no hahán nian.

 

Ne'e signifika katak nasaun sira tenki halo liu buat barak duké kompromisu sira ne'ebé sira asumi iha Akordu Paris nian.

 

Tema finansiamentu nian sei tama mós iha debate, hanesan mós ho ajuda públiku ba nasaun sira iha dezenvolvimentu ho folin dolar biliaun 100, ne'ebé promete to'o tinan 2020, hanesan objetivu hodi halo "matak liután" finansa mundial sira nian.

 

ho Lusa

horadoplaneta às 15:49 | link do post | comentar | Adicionar aos favoritos
Sexta-feira, 04.11.16

Akordu universal dahuluk hasoru alterasaun klimátiku hahú hala'o ona

Akordu Paris nian, paktu universal dahuluk hasoru akesimentu global, hahú, ho dalan simbóliku, hala'o ohin, liutiha tinan ida asina, maibé iha dalan naruk ida hodi hala'o to'o nia aplikasaun. 

 

 Foto@ Ian Langsdon / EPA

 

Akordu Paris, hahú hala'o hafoin asina tina iha loron 12 Dezembru tinan liubá hosi nasaun 195 iha kapital franseza, hafoin ratifika hosi númeru sufisiente hosi nasaun sira ne'ebé reprezenta 55% hosi emisaun mundial sira gás nian ho efeitu estufa.

 

Limiti ne'e hetan iha loron 05 Outubru, bainhira Uniaun Europeia (UE), ne'ebé reprezenta 12% hosi emisaun sira, entrega ona dokumentasaun ratifikasaun akordu nian iha sede ONU nian. To'o agora, nasaun hamutuk 61 maka ratifika tiha ona akordu ne'ebé konta de'it ho 47,7% hosi emisaun global sira.

 

Antes Konferénsia Klima ONU nian ba dala 22 (COP22), ne'ebé hahú iha loron-segunda iha Marraquexe, hosi signatáriu hamutuk 192 iha ona nasaun hamutuk 94 maka ratifika ona Akordu Paris nian, ritmu ida ne'ebé ultrapasa espetativu sira hosi espesialista sira.

 

"Ami halo iha fulan sia nia laran buat ne'ebé maka demora tinan ualu iha protokolu Kyoto nian", afirma ona hosi prezidente COP21, ministra franseza Ségolène Royal, ne'ebé haktuir hosi AFP.

 

Estadu sira nia resposta ne'ebé lalais hatudu katak iha konsiénsia, ho nível ne'ebé aas tebes, ba nesesidade hodi fó limiti ba akesimentu global ba +2°C aas liu duké nível pré-industrial sira.

 

Emisór maka'as sira ne'ebé seidauk ratifika akordu ne'e hanesan oituan: Rúsia la fó indikasaun kona-ba eventual loron ratifikasaun nian bainhira Austrália ho Japaun kompromete ona hodi avansa ho prosesu.

 

Maski nune'e, espesialista Alden Meyer, hosi organizasaun norte-amerikanu Uniaun hosi Sientista Preokupadu sira, alerta ona katak "hanesan importante mantén dinámiku Paris nian no la'ós de'it haksolok de'it ho akordu ne'ebé foin hala'o".

 

Negosiador sira sei iha matéria barak kona-ba saida maka tenki halo hodi to'o iha akordu, hodi sai hanesan paktu operasional, liuliu ba definisaun hosi regra sira transparénsia nian, aprezentasaun hosi estratéjia nasional sira to'o tinan 2050, ajuda finanseiru ba nasaun sira iha dezenvolvimentu.

 

"COP22 tenki sai hanesan reuniaun ida asaun no implementasaun nian", afirma hosi Tosi Mpanu-Mpanu, porta-vós hosi grupu hosi nasaun sira ne'ebé ladún avansadu ne'ebé maka haktuir hosi AFP.

 

Akordu Paris destina hodi substitui Protokolu Kyoto iha tinan 2020 iha objetivu hodi fó limiti ba akesimentu global ba +2°C aas liu duké nível pré-industrial sira.

 

Maibé, testu ne'e hatutan katak nasaun sira ne'ebé hakarak hala'o "esforsu nesesáriu sira" hodi labele ultrapasa 1,5 grau Celsius, bele evita nune'e "impaktu aat liu hosi alterasaun klimátiku sira".

 

Objetivu ikus ne'e halo parte tanba hetan ezijénsia hosi nasaun kiak sira no hosi Estadu insular sira, ne'ebé maka fraku liu hasoru alterasaun klimátiku sira hanesan nível tasi nian ne'ebé aumenta no rai-maran.

 

Maibé, espesialista sira aviza katak maski limiti ba +2°C sei susar hodi hetan, implika diminuisaun maka'as iha emisaun global sira hodi sunu karvaun, petróleu no gás.

 

Sientista sira aviza katak, ho ritmu atual, mundu sei iha grau haat ka grau tolu manas liu bainhira nasaun sira la kumpri limiti sira ne'ebé hato'o hodi hamenus emisaun nasional sira.

 

Iha loron-kinta ne'e, relatóriu ida hosi ONU fó hanoin katak Akordu Paris nian to'o tarde no hanesan urjente halo asaun hodi hamenus emisaun gás sira ho efeitu estufa bainhira hakarak evita "trajédia ida". Novidade hosi Akordu Paris nian maka, ba dala uluk, halibur tan nasaun sira ne'ebé kontamina no sira ne'ebé fraku liu.

 

Protokolu Kyoto, tinan 1997 nian, estabelese objetivu sira emisaun sira nian ba de'it nasaun dezenvolvidu sira, razaun ida ne'ebé EUA lakohi fó sai.

 

Akordu Paris nian hala'o hamutuk tuir dalan legal, maibé iha parte hosi nia dezenvolvimentu ka iha objetivu nasional sira hodi hamenus emisaun sira. Nia forsa bazeia iha mekanizmu ne'ebé sei haree tuir períudu kompromisu sira hosi nasaun ida-idak ne'ebé hanesan vinkulativu.

 

Estadu ida-idak tenki aprezenta konta sira hosi nia kumprimentu no renova sira nia kontributu ba tinan lima dala ida no nasaun sira ne'ebé hakarak bele uza mekanizmu sira merkadu nian (sosa no fa'an emisaun sira) hodi kumpri objetivu sira.

 

Akordu la estabelese kastigu sira bainhira la kumpri, maibé kalkula kriasaun hosi komité ida ne'ebé hanoin mekanizmu transparente ida hodi garanti katak bele kumpri kompromisu no hodi alerta, antes hotu nia prazu, katak hetan ka la'e objetivu sira.

 

ho Lusa

horadoplaneta às 12:36 | link do post | comentar | Adicionar aos favoritos
Quinta-feira, 13.10.16

Haiti hanesan nasaun ida ne'ebé ema mate barak tanba dezastre natural sira iha tinan 20 ikus ne'e

Haiti hanesan nasaun ida ne'ebé iha ema barak maka mate iha tinan 20 ikus ne'e tanba dezastre natural sira: 229.699, haktuir hosi relatóriu ida hosi ONU ne'ebé maka publika iha loron-kinta ne'e. 

 

Ambiente iha Port Salute, Haiti, hafoin furakasaun Matthew. Imajen hasai iha loron 07 Outubru 2016. EPA@ Bahare Khodabande

 

Ligasaun sira entre kiak no dezastre natural sira hanesan "loloos" iha kazu Haiti nian, hatete hosi reprezentante espesial ONU nian ba redusaun hosi risku sira katástrofe nian, Robert Glasser, iha konferénsia imprensa ida.

 

Iha mundu tomak, mate ona ema hamutuk millaun 1,35 tanba dezastre natural sira entre tinan 1996 no 2015, haktuir hosi relatóriu.

 

Hafoin Haiti, nasaun sira ne'ebé iha ema mate tanba ne'e maka Indonézia (182.136), ne'ebé afetadu ho 'tsunami' iha Índiku iha 2004 no Birmánia (139.515) ne'ebé hetan siklone Nargis iha 2008.

 

Hafoin mosu Xina, Índia, Pakistaun, Rúsia, Sri Lanka, Iraun no Venezuela.

 

Dokumentu kontabiliza dezastre natural hamutuk rihun hitu iha períudu hanesan no hatudu katak rai-nakdoko sira no tsunami sira hanesan dezastre sira ne'ebé oho maka'as, tuir dezastre sira ne'ebé relasionadu ho klima, haktuir hosi ONU iha komunikadu ida.

 

Nasaun sira ne'ebé riku liu iha "lakon ekonómiku maka'as" tanba dezastre natural sira, maibé iha nasaun sira ne'ebé kiak tebes "ema sira selu ho sira nia moris", haktuir hosi sekretáriu-jeral ONU nian, Ban Ki-moon, iha komunikadu hanesan.

 

ho Lusa

horadoplaneta às 15:15 | link do post | comentar | Adicionar aos favoritos

pesquisar

 

Novembro 2017

D
S
T
Q
Q
S
S
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30

posts recentes

arquivos

tags

subscrever feeds

blogs SAPO